పవర్ స్టార్ పవన్ కల్యాణ్ అభిమానులు ఎంతో ఆసక్తిగా ఎదురుచూస్తున్న చిత్రం ‘ఉస్తాద్ భగత్ సింగ్’. దర్శకుడు హరీశ్ శంకర్ దర్శకత్వంలో తెరకెక్కుతున్న ఈ సినిమా నుంచి తాజాగా ఓ అదిరిపోయే అప్‌డేట్ వచ్చింది. చిత్రంలోని తొలి పాట ‘దేఖ్ లేంగే సాలా’ ప్రోమోను చిత్రబృందం విడుదల చేసింది. ఈ పూర్తి పాటను డిసెంబర్ 13న విడుదల చేయనున్నట్లు ప్రకటించింది. తాజా ప్రోమో పవన్ ఫ్యాన్స్ అంచనాలకు తగ్గట్టుగానే ఉంది. పవన్ కల్యాణ్ ఎనర్జీ, దేవిశ్రీ ప్రసాద్ అందించిన పవర్‌ఫుల్ మ్యూజిక్ ప్రేక్షకులను విశేషంగా ఆకట్టుకుంటున్నాయి. ప్రతి ప్లేలిస్ట్, డ్యాన్స్ ఫ్లోర్‌ను ఈ పాట ఏలుతుందని చిత్ర యూనిట్ ధీమా వ్యక్తం చేసింది. ఈ మాస్ బీట్‌కు ప్రముఖ గాయకుడు విశాల్ దద్లానీ గాత్రం అందించగా, భాస్కరభట్ల సాహిత్యం సమకూర్చారు. మైత్రీ మూవీ మేకర్స్ నిర్మిస్తున్న ఈ చిత్రంలో పవన్ సరసన శ్రీలీల కథానాయికగా నటిస్తోంది. ప్రస్తుతం ఈ సాంగ్ ప్రోమో సోషల్ మీడియాలో ట్రెండింగ్‌లో ఉంది. పూర్తి పాట కోసం అభిమానులు ఆత్రుతగా ఎదురుచూస్తున్నారు.