ఈవార్తలు, టాలీవుడ్ న్యూస్ : తెలుగు ఇండస్ట్రీని ఏలుతున్న పెద్ద స్లార్ల కుటుంబంలో మెగా ఫ్యామిలీ ఫస్ట్ ఉంటుంది. చిరంజీవితో మొదలైన ఆ కుటుంబ లెగసీ.. నాగబాబు, పవన్ కల్యాణ్, రాంచరణ్ తేజ్, వరుణ్ తేజ్, నిహారిక.. ఇలా కొనసాగుతోంది. వారికి తోడుగా అల్లు ఫ్యామిలీ కూడా ఉంది. అల్లు రామలింగయ్య నుంచి మొదలై.. అల్లు అరవింద్ (నిర్మాత), అల్లు అర్జున్, అల్లు శిరీష్.. ఇలా అంతా మెగా ఫ్యామిలీగా ఉన్నారు. అల్లు అర్జున్ తనకంటూ ప్రత్యేకతను చాటుకుంటున్నా.. మెగా ఫ్యామిలీలో భాగమే అయినందున, మెగా ట్యాగ్ వచ్చేసింది. మొన్నటిదాకా అంతా ఒక్కటే అనుకున్న వీళ్ల మధ్యలో మొన్నటి ఏపీ ఎన్నికలు చిచ్చు పెట్టినట్లు అనిపిస్తోంది. ఎన్నికల సందర్భంగా వైసీపీ అభ్యర్థి శిల్ప రవికి మద్దతుగా బన్నీ ఎన్నికల ర్యాలీలో పాల్గొనడం సంచలనం రేపింది.

ఒకవైపు మెగా కుటుంబం నుంచి కూటమి తరఫున వైసీపీపై పవన్ కల్యాణ్ యుద్ధం చేస్తుండగా.. అదే వైసీపీ అభ్యర్థికి బన్నీ ప్రచారం చేయడం కొందరు మెగా అభిమానులకు మింగుడు పడలేదు. దీంతో అల్లు అర్జున్‌పై ట్రోల్స్ చేయడం ప్రారంభించారు. నాగబాబు మొదలుపెట్టిన ఈ వార్.. ఇప్పటికీ కొనసాగుతోంది. మొదట్లో తగ్గేదేలే అని అల్లు అర్జున్.. విమర్శలతో మెగా కుటుంబసభ్యులు కత్తులు దూసుకున్నట్లు కనిపించారు. అయితే, ఆ మధ్యలో ఈ వ్యవహారం కాస్త సద్దుమణిగినట్లు కనిపించినా.. తాజాగా వరుణ్ తేజ్ చేసిన కామెంట్స్ హాట్ టాపిక్‌గా మారాయి. ఆ కామెంట్లే ఇప్పుడు మళ్లీ మెగా ఫ్యామిలీలో పెద్ద వార్‌కు కారణం అవుతుందని పలువురు సినీ విశ్లేషకులు అభిప్రాయపడుతున్నారు.

అసలేం జరిగిందంటే.. వరుణ్ తేజ్ నటించిన మట్కా సినిమా ప్రీ రిలీజ్ ఈవెంట్‌ తాజాగా నిర్వహించారు. మాఫియా అంశంతో వస్తున్న ఈ సినిమా నవంబర్ 14న విడుదల అవుతోంది. కరుణ కుమార్ దర్శకత్వంతో తెరకెక్కిన ఈ చిత్రంలో మీనాక్షి చౌదరి హీరోయిన్‌గా నటించింది. నోరా ఫతేహీ, నవీన్ చంద్ర కీలక పాత్రల్లో నటించారు. ప్రీ రిలీజ్ ఈవెంట్‌లో వరుణ్ తేజ్ మాట్లాడుతూ.. ‘ప్రతి ఈవెంట్ లో చరణ్ అన్న గురించి, బాబాయ్ గురించి, పెదనాన్న గురించి మాట్లాడుతున్నా. ప్రతి సారి నేను ఎందుకు ఇలా మాట్లాడుతున్నానని కొందరు అనుకోవచ్చు. కానీ.. నేను కచ్చితంగా వాళ్ల గురించి మాట్లాడతా. ఎందుకంటే వాళ్లంతా నా ఫ్యామిలీ. నువ్వు ఎక్కడి నుంచి మొదలుపెట్టావ్? ఎక్కడి నుంచి వచ్చావ్? నీ వెనుక సపోర్ట్ ఎవరు? అనే విషయాలు మరువొద్దు.  నువ్వు సక్సెస్ అవ్వొచ్చు.. అవ్వక పోవచ్చు. కానీ నీ వెనుక ఉన్న వాళ్లను మర్చిపోతే నీ సక్సెస్ ఎందుకూ పనికిరాదు’ అని వ్యాఖ్యానించాడు.

అయితే.. ఈ వ్యాఖ్యలు అల్లు అర్జున్‌ను ఉద్దేశించి చేసినవే అంటూ సోషల్ మీడియాలో చర్చ నడుస్తోంది. ఇప్పటి వరకు స్తబ్దుగా ఉన్న వార్‌ను మళ్లీ వరుణ్ తేజ్ మొదలు పెట్టేశాడని బన్నీ ఫ్యాన్స్ ఆరోపిస్తున్నారు. కావాలనే రచ్చ లేపుతున్నారని ఆగ్రహం వ్యక్తం చేస్తున్నారు. వరుణ్ తేజ్ కామెంట్స్‌లో తప్పేముందని, నిజమే చెప్పాడని మెగా అభిమానులు బదులిస్తున్నారు. అయితే.. ఇవన్నీ సినిమా ప్రమోషన్‌ కోసం ఆడుతున్న నాటకాలు అని మరికొందరు వ్యాఖ్యానిస్తున్నారు. ఏదేమైనా.. వరుణ్ తేజ్ కామెంట్స్ ఇప్పుడు ట్రెండ్ అవుతన్నాయి. ఈ వ్యాఖ్యలు ఏ స్థాయికి దారితీస్తాయో..!