||ప్రతీకాత్మక చిత్రం||

ఈవార్తలు, బిజినెస్ : జనవరిలో బ్యాంకు క్యాలెండర్ ప్రకారం 30, 31 తేదీల్లో సెలవులు లేవు. కానీ, బ్యాంకులు ఆ రోజు బంద్ కానున్నాయి. ఎందుకంటారా? ఆ రెండు రోజుల్లో సమ్మెకు దిగుతున్నట్లు యునైటెడ్ ఫోరమ్ ఆఫ్ బ్యాంక్ యూనియన్ ప్రకటించింది. బ్యాంక్ ఉద్యోగులకు వారంలో ఐదు రోజుల పని దినాలను అముల చేయాలని కోరుతూ ఈ యూనియన్ సమ్మెకు దిగుతున్నట్లు వెల్లడించింది. తమ డిమాండ్‌పై ఇండియన్ బ్యాంక్ అసోసియేషన్ ఏ చర్యలు తీసుకోనందున సమ్మెకు మొగ్గు చూపుతున్నట్లు స్పష్టం చేసింది. ఈ మేరకు ముంబైలో జరిగిన ఓ కార్యక్రమంలో ఆలిండియా బ్యాంక్ యూనియన్ అసోసియేషన్ జనరల్ సెక్రటరీ వెంకటాచలం వెల్లడించారు. ఐదు రోజుల పనిదినాలే కాకుండా, పెన్షన్ అప్‌డేషన్, వేతన సవరణ, అన్ని కేడర్లలో నియామకాలు సహా పలు డిమాండ్లు ఉన్నాయని ఆయన తెలిపారు. 

ఈ నేపథ్యంలో జనవరి 30, 31 తేదీల్లో సమ్మె ఉంటే.. ఆ రోజుల్లో బ్యాంకులు పనిచేయవు. ఈ తేదీలను గుర్తుంచుకొని ఆ రోజుల్లో ప్రజలు బ్యాంకు పనులు పెట్టుకోవద్దని సూచించారు. ఆ రోజుల్లో ఏటీఎంలపైనా ప్రభావం పడే అవకాశం ఉందని వివరించారు. అందుకే ముందు జాగ్రత్తగా బ్యాంకు లావాదేవీలను పూర్తి చేసుకోవడమో, వాయిదా వేసుకోవడమో చేయాలని పేర్కొన్నారు.