అంతకుముందు.. ముంబై ఇండియన్స్ సొంత గడ్డ వాంఖడే స్టేడియంలో ముంబై బ్యాటర్లను గుజరాత్ బౌలర్లు కట్టడి చేశారు. టాపార్డర్‌లో విల్‌ జాక్స్‌(53) హాఫ్ సెంచరీ చేసినా.. మిడిల్ ఆర్డర్ అంతగా ఆకట్టుకోకపోవడంతో కేవలం 155 పరుగులే చేసింది. చివర్లో కార్బిన్ బాస్చ్ బ్యాట్ ఝలిపించడంతో ఆ మాత్రం స్కోరైనా చేయగలిగింది. 6 విజయాలతో జోరుమీదున్న ముంబై.. టాస్‌ ఓడి బ్యాటింగ్‌కు దిగింది. అయితే.. గుజరాత్‌ టైటాన్స్‌ బౌలర్ల ధాటికి ప్రధాన ఆటగాళ్లు తేలిపోయారు. పవర్‌ ప్లేలో గుజరాత్ ఫీల్డర్లు మూడు క్యాచ్‌లు వదిలేసినా ముంబై భారీ స్కోర్‌ చేయలేకపోయింది. ముంబైకి సిరాజ్‌ ఆదిలోనే షాకిచ్చాడు. ఓపెనర్‌ రియాన్‌ రికెల్టన్‌(2)ను ఔట్‌ చేశాడు. ఆ తర్వాత బంతికే విల్‌ జాక్స్‌ ఇచ్చిన సులువైన క్యాచ్‌ను సుదర్శన్‌ నేలపాలు చేశాడు. లైఫ్‌ లభించడంతో జాక్స్‌ బౌండరీలతో రెచ్చిపోయాడు. మరో ఎండ్‌లో ఉన్న రోహిత్‌ శర్మ(7)ను అర్షద్‌ పెవిలియన్‌ పంపాడు. ఆ తర్వాత సూర్యకుమార్‌ యాదవ్‌(35)తో కలిసి జాక్స్‌ ఇన్నింగ్స్ నిర్మించాడు. ఈ ఇద్దరూ మూడో వికెట్‌కు 69 పరుగులు జోడించారు. అయితే.. సూర్య కుమార్ యాదవ్‌ను సాయి కిశోర్‌ ఔట్‌ చేసి జోడీని విడదీశాడు. ఆ తర్వాత కాసేపటకే జాక్స్‌ను రషీద్‌ ఖాన్‌ పెవిలియన్‌ పంపాడు. కెప్టెన్‌ హార్దిక్‌ పాండ్యా(1), తిలక్‌ వర్మ (7), నమన్‌ ధిర్‌(7) విఫలం అయ్యారు.