ఈవార్తలు, స్పోర్ట్స్ న్యూస్: కోల్‌కతా నైట్ రైడర్స్ ఐపీఎల్-2024 (IPL) ట్రోఫీ గెలవడంలో కీలకపాత్ర పోషించిన ఆ టీమ్ మెంటార్ గౌతమ్ గంభీర్ (Gautam Gambhir) టీమిండియాకు హెడ్ కోచ్‌గా ఖరారయ్యారా? అంటే దాదాపు అయినట్టేనని విశ్వసనీయ వర్గాల సమాచారం. ఇప్పటికే కోచ్ విషయమై గౌతమ్ గంభీర్, బీసీసీఐ (BCCI) చర్చించినట్లు తెలిసింది. ఈ ఏడాది జరగబోయే టీ20 వరల్డ్ కప్ తర్వాత ప్రస్తుత హెడ్ కోచ్ రాహుల్ ద్రవిడ్ (Rahul Dravid) పదవీకాలం ముగియనుంది. పదవి పొడగింపునకు ద్రవిడ్ సుముఖంగా లేరు. ఈ నేపథ్యంలో కొత్త కోచ్‌ను ఆలోపే ఖరారు చేయాలని బీసీసీఐ ప్లాన్ చేస్తోంది. ఇందులో భాగంగానే కోచ్ నియామకానికి ప్రకటన విడుదల చేసింది. అయితే, ఆ పదవికి గంభీర్ దరఖాస్తు చేసుకోలేదు. అయినా, జై షాతో పాటు బీసీసీఐ పెద్ద తలకాయలు గంభీర్‌ను ఆశ్రయించినట్లు తెలిసింది.

ఈ సందర్భంగా గంభీర్, బీసీసీఐ మధ్య జరిగిన చర్చ సందర్భంగా ‘దేశ్ కే లియే కర్‌నా హై (దేశం కోసం హెడ్ కోచ్ పదవి చేపట్టాలి)’ అని చర్చ జరిగినట్లు విశ్వసనీయ వర్గాల సమాచారం. బీసీసీఐ పెద్దలకు చాలా దగ్గరి వ్యక్తి అయిన ఓ ఐపీఎల్ ఫ్రాంచైజీ ఓనర్ గంభీర్‌కు కోచ్ పదవి కన్ఫార్మ్ అయినట్లు ధ్రువీకరించారని క్రికెట్ వర్గాలు వెల్లడించాయి. అయితే, దీనిపై బీసీసీఐ ఎలాంటి అధికారిక ప్రకటన చేయలేదు. 

గంభీర్ ట్రాక్ రికార్డు ఇదీ..

- 2011 వరల్డ్ కప్ గెలిచిన టీంలో సభ్యుడు.

- ఐపీఎల్‌లో కోల్‌కతా నైట్ రైడర్స్‌కు సారథిగా వ్యవహరించి 2012, 2014 టైటిల్స్‌ను సాధించాడు.

- రీసెంట్‌గా గంభీర్ మెంటార్‌గా వచ్చాకే కోల్‌కతా మూడో టైటిల్ కొట్టింది.

- భారత్‌కు ఎన్నో చిరస్మరణీయ విజయాలు అందించాడు.

- ఎడమ చేతి వాటం బ్యాటర్ అయిన గంభీర్.. సెహ్వాగ్‌తో కలిసి ఎన్నో అద్భుతమైన ఇన్నింగ్స్‌ను నిర్మించాడు. 2011 వరల్డ్ కప్ ఫైనల్‌లోనూ 97 పరుగులు చేసి కప్ గెలవడంలో కీలక పాత్ర పోషించాడు.

- అన్నింటికన్నా ముఖ్యంగా క్రికెటర్ల ప్రతిభను గుర్తించగలడు. వెస్టిండీస్ బౌలర్ సునీల్ నరైన్‌ను ఓపెనర్‌గా పంపి సక్సెస్ అయ్యాడు. ఆ దెబ్బకు ఈ ఐపీఎల్‌లో నరైన్ సృష్టించిన విధ్వంసం అంతా ఇంతా కాదు.

- అయితే, ధోనీపై విమర్శలు, కోహ్లీతో గొడవ లాంటి ఘటనలు గంభీర్ సామర్థ్యాన్ని ప్రశ్నిస్తున్నాయి. యువ క్రికెటర్లతో కలిసిపోగలడా? ముక్కుసూటి వ్యక్తిత్వం క్రికెటర్లకు నచ్చుతుందా? అనేది తెలియాలి.