కోట్లమంది ఆకలితో అలమటించే మన దేశంలో 5,000 కోట్లు ఖర్చు చేసి పెళ్లి చెయ్యడం అవసరమా? ఆ డబ్బు పేదలకు దానం చేస్తే వారి కడుపు నిండుతుందిగా అని చాలామంది నీతులు చెప్తున్నారు. పేదలకి దానం చేసిన డబ్బుతో ఆ పూట వరకు ఆ పేదల కడుపు నిండుతుంది ఏమో కానీ వారి పేదరికం మాత్రం పోదు. మళ్లీ తర్వాత రోజు కడుపులు చేత పట్టుకోవాల్సిందే. పేదరికం పోవాలంటే ఎవరో చేసిన దానాలతో సాధ్యం కాదు, ప్రభుత్వం మెరుగైన పాలసీలతో చర్యలు చేపట్టాలి. అప్పుడే పేదరికం తగ్గుతుంది. అయినా అంబానీ తన కంపెనీల ద్వారా లక్షల మందికి ఉద్యోగాలు ఇచ్చి వారి కుటుంబంలో వారికి రోజూ కడుపు నింపుతూనే ఉన్నాడు. ఆ విధంగా వారికి మంచి జీవితాన్ని ఇవ్వడమే కాకుండా వారి పిల్లలు మంచిగా చదువుకోడానికి, మంచి ఇల్లు కట్టుకోడానికి, వారి కష్టాలు తీరడానికి కూడా కారణం అవుతున్నాడు. దీని కన్నా గొప్పగా అన్నదానం చేసి ఒకరోజు కడుపు నింపడం సరిపోతుందా? మీకు తెలుసో లేదో అనంత్ అంబానీ పెళ్లి సందర్భంగా అంటిలియా దగ్గర 40 రోజుల నుండి రోజూ 9,000 మందికి ఉచితంగా భోజనం పెట్టే కార్యక్రమం జరుగుతూ ఉంది. ఇది పెళ్లి భండారా చివరి రోజైన జూలై 15తో ముగిసింది.

మనలో చాలామంది ఆస్తులు అమ్మి లేదా అప్పులు చేసి మరీ గ్రాండ్ గా పెళ్లి చేసుకుంటారు. కానీ అంబానీ తనకున్న ఆస్తిలో కేవలం 0.5% మాత్రమే పెళ్లి కోసం ఖర్చు చేస్తున్నాడు. ఈ ఖర్చు కూడా వృధా ఏం పోదు. మ్యారేజ్ ఈవెంట్స్ మీద ఆధారపడి బతికే వేలమందికి ఈ పెళ్లి ద్వారా ఉపాధి దొరుకుతుంది. ఆవిధంగా సంపాదించుకున్న డబ్బు కొంతమందికి ఒకరోజు కడుపు నింపితే కొంతమందికి ఏడాది పాటు కడుపు నింపొచ్చు. ఏ ధనవంతులు అయినా వారి డబ్బుని ఆస్తుల రూపంలో దాచుకుంటే దేశానికి నష్టం. కానీ ఇలా భారీగా ఖర్చు చేస్తే మార్కెట్ లోకి మనీ చేరి దేశంతో పాటు ఎంతోమందికి లాభం చేస్తుంది. అయినా తినడానికి తిండి లేకున్నా మీసాలకు సంపెంగ నూనె అన్నట్టు మనమేమో అప్పులు చేసి మరీ గ్రాండ్ గా పెళ్ళిళ్ళు చేసుకోవాలి. కానీ అంబానీ తనకు ఉన్నదానిలో కాస్త ఖర్చు చేసి పెళ్లి చేసుకుంటే మాత్రం కడుపు మంటతో పెళ్లికి అంత ఖర్చు అవసరమా? పేదలకు దానం చేయొచ్చుగా అని నీతులు చెప్పాలి. అసలు ఈ నీతులు చెప్పేవాళ్ళు దానం చెయ్యడం కాదు కదా, కనీసం ఎంగిలి చేత్తో కాకిని కూడా తోలి ఉండరు. వాళ్ళు పాటించరు. కానీ ఇతరులకు చాలా తేలికగా నీతులు చెప్పేస్తారు. అయినా అంబానీ వాళ్ళకి ఉన్నదానితో వాళ్ళు పెళ్లి చేసుకుంటుంటుంటే మధ్యలో మీ గోల ఏంటి? మీ పెళ్లి ఎలా చేసుకోవాలో, దేనికి ఎంత ఖర్చు చెయ్యాలో ఎవడైనా చెప్తే మీరు ఊరుకుంటారా?

(ఓ ఫేస్‌బుక్ మిత్రుడి వాల్ నుంచి సేకరించినది)