ఆఫీస్‌కు వెళ్తుండగా మీ కారు ప్రమాదానికి గురైతే ఆఫీస్‌కు రాలేని పరిస్థితి అని మీ బాస్‌కు చెప్తారు కదా. బాస్‌కు చెప్పగానే అర్థం చేసుకొని ఆయన కొంచెం సానుభూతి వ్యక్తం చేసి, జాగ్రత్తలు చెప్తారని ఆశిస్తాం. కానీ.. కారు ప్రమాదం జరిగినా ఆఫీస్‌కు రావాలని అంటే.. వీడేం సైకో.. శాడిస్ట్ అని తిట్టుకుంటాం. అలాంటి సంఘటనే ఓ ఉద్యోగికి జరిగింది. ప్రమాదం జరిగి కారు తుక్కుతుక్కు అయినా.. ఆఫీస్‌కు రావాల్సిందేనన్న బాస్ రిప్లై ఓ ఉద్యోగికి షాక్ తెప్పించింది. పైగా ఆఫీస్ టైం వరకు డ్యూటీలో ఉండాలని ఆదేశించడం గమనార్హం. ప్రమాదంలో ఎవరైనా చనిపోతే తప్ప లేట్ రావడానికి మినహాయింపు లేదని కూల్‌గా సమాధానం వచ్చేసరికి ఆ ఉద్యోగికి దిమ్మదిరిగిపోయింది. తన బాస్ శాడిజం ఎలాంటిదో ప్రపంచానికి చెప్పాలనుకున్న ఆ ఉద్యోగి.. తన బాస్‌తో జరిగిన వాట్సాప్ చాట్‌ను సోషల్ మీడియాలో పోస్ట్ చేశాడు.

ఆ చాట్‌లో.. సదరు ఉద్యోగి కారు డ్యామేజ్ అయిన ఫొటోను పంపగా, ‘ఆఫీస్‌కు ఎందుకు లేట్ అవుతుందన్నది అర్థం చేసుకోగలను. కానీ, ఎవరైనా చనిపోతే తప్ప ఆఫీస్‌కు లేట్‌గా రావొద్దు. ఏ కంపెనీ అయినా ఇతరత్రా వాటికి మినహాయింపు ఇవ్వదు’ అని బాస్ కూల్‌గా రిప్లై ఇవ్వడంతో ఆ ఉద్యోగికి చిర్రెత్తుకొచ్చింది. దీన్ని సోషల్ మీడియాలో పోస్ట్ చేయగా.. ‘ఇలాంటి బాస్‌లు ఉంటే అంతకుమించిన నరకం ఏముంటుంది?.. వెంటనే మీ బాస్‌ను బ్లాక్ చేసేయండి. మళ్లీ ఎప్పుడూ ఆ ఆఫీస్ ముఖం చూడొద్దు.. నాకూ గతంలో పనిచేసిన కంపెనీలో ఇలాగే జరిగింది..’ అంటూ నెటిజన్లు కామెంట్లు పెడుతున్నారు. ప్రస్తుతం ఈ స్క్రీన్ షాట్ నెట్టింట్లో వైరల్ అవుతోంది.