తెలుగుదేశం పార్టీ సీనియర్ నేత, మాజీ మంత్రి, నర్సీపట్నం ఎమ్మెల్యే చింతకాయల అయ్యన్నపాత్రుడు మాజీ ముఖ్యమంత్రి వైయస్ జగన్మోహన్ రెడ్డిపై సంచలన వ్యాఖ్యలు చేశారు. ఒక సీనియర్ నాయకుడితో మాట్లాడుతున్న వీడియో ప్రస్తుతం సామాజిక మాధ్యమాల్లో వైరల్ గా మారింది. ఈ వీడియోలో అయ్యన్నపాత్రుడు మరో వ్యక్తితో మాట్లాడుతున్నారు. అవతల వ్యక్తి మాట్లాడుతూ జగన్మోహన్ రెడ్డి ఓడిపోయాడని, చనిపోలేదన్నారు. ధన బలం, కుల బలం అధికంగా ఉందని, పక్క రాష్ట్రంలోని ప్రభుత్వంలో కూడా జగన్ మనుషులు ఉన్నారంటూ పేర్కొన్నారు. జగన్ లేవకుండా కొట్టాలి అన్నారు. ఈ సందర్భంగా అయ్యన్నపాత్రుడు కూడా మాట్లాడుతూ.. జగన్మోహన్ రెడ్డి ఓడిపోయారే తప్ప చనిపోలేదని పేర్కొన్నారు. మీరు చెప్పారు కదా ఓడిపోయాడు కానీ చావలేదని, అది మంచి డైలాగ్ అని అయ్యన్నపాత్రుడు అన్నారు. దీనికి స్పందించిన ఆ పెద్దాయన డబ్బుకు అమ్ముడు పోనివాడు దేశంలో ఎవడు లేడని, ఆ డబ్బు, పవర్ ఇప్పటికీ ఆయనకీ ఉన్నాయని జగన్ ఉద్దేశించి పేర్కొన్నారు. దీనిపై స్పందించిన అయ్యన్నపాత్రుడు.. ఓడిపోయాడు కానీ చావలా అనే డైలాగ్ బాగుందని, పామును చచ్చే వరకు కొట్టాలన్నారు. ప్రస్తుతం ఈ మాటలకు సంబంధించిన వీడియో సామాజిక మాధ్యమాల్లో తెగ వైరల్ అవుతోంది. గతంలో కూడా జగన్ పై అయన పాత్రుడు వివాదాస్పద వ్యాఖ్యలు అనేకసార్లు చేశారు. వీలు చిక్కినప్పుడల్లా జగన్ టార్గెట్గా అయ్యన్న విమర్శలు గుప్పిస్తూనే ఉన్నారు. తాజాగా చేసిన ఈ వ్యాఖ్యల వీడియో ప్రస్తుతం సామాజిక మాధ్యమాల్లో వైరల్ గా మారుతుండడం గమనార్హం.