ఈవార్తలు, హైదరాబాద్ : తెలంగాణ రాష్ట్ర ఆవిర్భావ దశాబ్ది ముగింపు వేడుకలను బీఆర్ఎస్ ఆధ్వర్యంలో నిర్వహించాలని ఆ పార్టీ అధినేత, తెలంగాణ తొలి సీఎం కేసీఆర్ నిర్ణయించారు. ఇందులో భాగంగా జూన్ 1, జూన్ 2, జూన్ 3 తేదీల్లో మూడు రోజులపాటు ఘనంగా వేడుకలు జరుగనున్నాయి. ఈ సందర్భంగా కేసీఆర్ పార్టీ శ్రేణులకు పిలుపునిచ్చారు. తెలంగాణను సాధించి, స్వరాష్ట్రంలో తొట్టతొలి ప్రభుత్వాన్ని ఏర్పాటు చేసి ప్రజల సహకారంతో దశాబ్దకాలం పాటు ప్రగతిని సాధించి దేశానికే ఆదర్శంగా తెలంగాణను నిలిపిన ఘనత గత బీఆర్ఎస్ ప్రభుత్వానిదేనని పునరుద్ఘాటించారు. ఈ చారిత్రక సందర్భంలో దశాబ్ది ముగింపు వేడులను ఘనంగా నిర్వహించాలని పార్టీ శ్రేణులకు పిలుపునిచ్చారు. గ్రామస్థాయి నుంచి రాష్ట్రస్థాయి దాకా కార్యకర్తలు, పార్టీ సూచనల మేరకు ముగింపు వేడుకల్లో పెద్దఎత్తున పాల్గొని విజయవంతం చేయాలని కోరారు.

జూన్ 1: సాయంత్రం 7 గంటలకు గన్‌పార్క్ అమరవీరుల స్థూపం నుండి ట్యాంక్‌బండ్ వద్ద ఉన్న అమరజ్యోతి వరకు క్యాండిల్ ర్యాలీ నిర్వహించనున్నారు. ఈ సందర్భంగా తెలంగాణ రాష్ట్ర సాధనలో ప్రాణత్యాగాలు అర్పించిన అమరులకు పుష్పాంజలి ఘటించి ఘననివాళి అర్పిస్తారు.

జూన్ 2: (తెలంగాణ ఆవిర్భావ దినోత్సవం రోజున) దశాబ్ది ముగింపు వేడుకల సభను హైదరాబాద్‌లోని తెలంగాణ భవన్‌లో నిర్వహిస్తారు. అదే రోజు హైదరాబాద్‌లోని పలు దవాఖానల్లో, అనాథ శరణాలయాల్లో పండ్లు స్వీట్లు పంపిణీ చేస్తారు.

జూన్ 3: రాష్ట్రవ్యాప్తంగా అన్ని జిల్లాల్లో బీఆర్ఎస్ పార్టీ కార్యాలయాల్లో తెలంగాణ ఆవిర్భావ దశాబ్ది ముగింపు వేడుకలు నిర్వహిస్తారు. ఈ సందర్భంగా పార్టీ జెండా, జాతీయ జెండాను ఎగరవేస్తారు. ఆయా జిల్లాల్లోని దవాఖానలు, అనాథా శరణాలయాల్లో స్వీట్లు, పండ్లు పంపిణీ చేస్తారు.