అమెరికా అధ్యక్ష రేసు నుంచి జో బైడన్ తప్పుకునే అవకాశాలు కనిపిస్తున్నాయి. వృద్ధాప్యం, అనారోగ్యంతో సతమతమవుతున్నా, ప్రసంగాలు, డిబేట్ల సమయంలో తడబాటుతో సమర్థంగా వాదనలు వినిపించలేకపోతున్నా.. రెండోసారి అధ్యక్ష పదవిలో కొనసాగి తీరతానని భీష్మించుకున్న అమెరికా అధ్యక్షుడు జో బైడెన్ (81) ఇప్పుడు వెనక్కి తగ్గుతున్నారు. డెమోక్రటిక్ పార్టీ అభ్యర్థిగా తప్పుకునేందుకు అంగీకరించి ఆయన ఉపాధ్యక్షురాలు కమలా హ్యారిష్ అభ్యర్థిత్వానికి మద్దతు ఇవ్వడానికి మాత్రం నిరాకరించారని ఆ పార్టీ వర్గాలు చెబుతున్నాయి. ఈ మేరకు ఆదివారంలోపు ఆయన తన నిర్ణయాన్ని ప్రకటించే అవకాశం ఉందని చెబుతున్నారు. దీనిపై బైడన్ గానీ, ఆయన ప్రచారం బృందంగానీ ఇంత వరకు స్పందించలేదు.

అభ్యర్థిని అధికారికంగా ఖరారు చేసేందుకు డెమోక్రటిక్ పార్టీ జాతీయ సదస్సు వచ్చే నెలలో జరగనుంది. బైడన్ నిన్న, మొన్నటిదాకా అండగా నిలబడిన మాజీ అధ్యక్షుడు బరాక్ ఒబామా, ప్రతినిధుల సభ మాజీ స్పీకర్ న్యాన్సి ఫెలోషి ఇటీవల కాలంలో ఆయన అనారోగ్యంపై ఆందోళన వ్యక్తం చేస్తున్నారు. తాజాగా ఆయనకు కోవిడ్ సోకింది.  విజయవకాశాలు బాగా తగ్గిపోయాయని ఒబామా పార్టీ సన్నిహితులతో అన్నట్టు ప్రచారం జరుగుతోంది. బైడెన్ అనారోగ్యం ఆందోళన కలిగిస్తోందని, ఈ నేపథ్యంలో రెండోసారి బరిలో దిగే అంశంపై ఆయన తీవ్రంగా ఆలోచించాలని సూచించినట్లు వాషింగ్టన్ పోస్ట్ పత్రిక తెలియజేసింది. మాజీ అధ్యక్షుడు రిపబ్లికన్ పార్టీ అభ్యర్థి డోనాల్డ్ ట్రంప్ తో కొన్నాళ్ల కిందట జరిగిన డిబేట్ లో బైడన్ తేలిపోయాక చాలా మంది డెమొక్రటిక్ సెనెటర్లు, ప్రతినిధుల సభ సభ్యులు, సీనియర్ నేతలు ఆయన తప్పుకోవాలని డిమాండ్ చేయడం మొదలుపెట్టారు. రేసు నుంచి బైడన్ వైదొలగకపోతే పరాజయం తప్పదని నాన్సీ ఫెలోషి కూడా బయటకు నచ్చచెప్పేందుకు ప్రయత్నించినట్లు తెలిసింది. మరోవైపు కోవిడ్ కారణంగా బైడన్ ప్రస్తుతం డెలవరిలో ఐసోలేషన్లో ఉన్నారు. తన అభ్యర్థిత్వంపై లేనిపోని ఊహాగానాలు వద్దని అన్నారు.