వర్షాకాలంలో లేదా వాతావరణంలో మార్పులు వచ్చినప్పుడు చిన్న చిన్న వ్యాధులు, ఇతర ఇన్ఫెక్షన్లు శరీరంలో రోగనిరోధక శక్తి తక్కువగా ఉండటం వల్ల అటాక్ చేస్తాయి. పెరుగుతున్న వ్యాధులు, ఇన్ఫెక్షన్లను తగ్గించాలంటే  మన రోగనిరోధక శక్తిని బలోపేతం చేయడం చాలా ముఖ్యం. రోగనిరోధక శక్తిని పెంచడంలో కొన్ని ఇంటి నివారణలు చాలా ప్రభావవంతంగా ఉంటాయి. మీ రోగనిరోధక శక్తిని పెంచడంలో సహాయపడే కొన్ని సులభమైన,సహజమైన నివారణలు ఉన్నాయి. అవేంటో చూద్దాం. 

అల్లం, తేనె:

ఇది ప్రాచీన కాలం నుండి అనుసరిస్తున్న ఆయుర్వేద ఔషధం. అల్లంలో యాంటీ ఇన్‌ఫ్లమేటరీ, యాంటీఆక్సిడెంట్ గుణాలు ఉన్నాయి. ఇవి శరీరం యొక్క రోగనిరోధక శక్తిని బలోపేతం చేయడానికి సహాయపడతాయి. ప్రతి రోజూ ఉదయం ఖాళీ కడుపుతో అల్లం రసం తీసుకుని అందులో కొంచెం తేనె కలిపి తీసుకుంటే రోగనిరోధక శక్తి పెరుగుతుంది.

తులసి:

తులసి ఆకుల్లో యాంటీ బ్యాక్టీరియల్, యాంటీ వైరల్, యాంటీ ఫంగల్ గుణాలు పుష్కలంగా ఉన్నాయి. రోజూ 4 నుంచి 5 తులసి ఆకులను నమలడం లేదా తులసి కషాయం తాగడం వల్ల రోగనిరోధక శక్తి పెరుగుతుంది. తులసి ఆకుల కషాయాన్ని టీగా చేసుకుని తాగవచ్చు.

తిప్పతీగ: 

తిప్పతీగ ఒక అద్భుతమైన ఆయుర్వేద మూలిక. ఇది రోగనిరోధక శక్తిని బలోపేతం చేయడంలో చాలా ఉపయోగకరంగా ఉంటుంది.తిప్పతీగ రసం లేదా మాత్రలను క్రమం తప్పకుండా తీసుకోవడం వల్ల శరీరంలో రోగనిరోధక శక్తి పెరుగుతుంది.

పసుపు:

పసుపులో కర్కుమిన్ అనే శక్తివంతమైన యాంటీఆక్సిడెంట్ శరీరానికి ఎంతో మేలు చేస్తుంది. పసుపును పాలలో కలిపి తాగడం వల్ల జలుబు, దగ్గు, ఇతర ఇన్ఫెక్షన్లు రాకుండా ఉంటాయి. ఇందులో యాంటీబయాటిక్ గుణాలు కూడా ఉన్నాయి. దీన్ని వంటలో ఉపయోగించడం వల్ల కూడా ఆరోగ్య ప్రయోజనాలు పొందవచ్చు.

వెల్లుల్లి:

వెల్లుల్లిలో రోగనిరోధక శక్తిని పెంచే అల్లిసిన్ ఉంటుంది. పచ్చి వెల్లుల్లిని తినడం లేదా ఆహారంలో చేర్చడం వల్ల శరీరంలో రోగనిరోధక శక్తి పెరుగుతుంది. ఇది అనేక కడుపు సంబంధిత వ్యాధులను నయం చేయడంలో కూడా సహాయపడుతుంది.

నిమ్మరసం:

నిమ్మకాయలో విటమిన్ సి పుష్కలంగా ఉంటుంది. ఇది రోగనిరోధక శక్తిని బలపరుస్తుంది. ఉదయాన్నే ఖాళీ కడుపుతో గోరువెచ్చని నీటిలో నిమ్మరసం కలిపి తాగడం వల్ల శరీరంలో రోగనిరోధక శక్తి పెరుగుతుంది.