రక్తహీనతను తగ్గించి, ఎముకలను బలంగా చేసే హెల్తీ లడ్డూ.. నువ్వుల లడ్డూ. పిల్లలు, పెద్దవాళ్లు రోజుకో లడ్డూ తింటే ఆరోగ్యానికి చాలా మంచిది. అలాగే బలహీనంగా ఉన్న పిల్లలు, రక్తం బాగా తక్కువగా ఉన్నవారు ఈ లడ్డునూ రోజుకోకటి తినడం చాలా మంచిదని ఆరోగ్య నిపుణులు స్పష్టం చేస్తున్నారు. టేస్ట్ కూడా చాలా బాగుంటుంది, చాలా తొందరగా చేసుకునే రెసీపీ. ఈ లడ్డు ఎలా తయారుచేసుకోవాలి, కావాల్సిన పదార్థాలు ఏంటి తెలుసుకుందాం..

కావలసిన పదార్థాలు: నువ్వులు ఒక కప్పు, బెల్లం ఒక కప్పు, నెయ్యి

తయారీ విధానం:

స్టవ్ ఆన్ చేసి ఒక కప్పు నువ్వులను తక్కువ నుంచి మీడియం మంట పెట్టి వేయించాలి. వేయించినంతసేపు కలుపుతూ ఉండాలి.

నువ్వులు వేడి అయ్యాక అందులో కొంచెం నెయ్యి వేసుకోవాలి.

నువ్వులు చిటపట అంటూ ఎర్రగా అయ్యే వరకు వేయించుకొని చల్లార్చాలి.

ఈ నువ్వుల్లో నుంచి 2, 3 టేబుల్ స్పూన్‌ల నువ్వులను తీసి పక్కన పెట్టుకొని, మిగిలిన నువ్వులను మిక్సీ జార్‌లోకి తీసుకొని గ్రైండ్ చేసుకోవాలి.

మిక్సీ జార్‌లోని నువ్వులలో ఒక కప్పు బెల్లాన్ని కూడా వేసుకొసి గ్రైండ్ చేసుకోవాలి.

ఇప్పుడు ఆ మొత్తం మిశ్రమాన్ని ప్లేట్‌లోకి తీసుకొని ముందుగా తీసి పక్కన పెట్టుకున్న మూడు టేబుల్ స్పూన్‌ల నువ్వులను అందులో కలుపుకోవాలి.

అదే మిశ్రమంలో కొంచెం యాలకుల పొడి, ఒక స్పూన్ నెయ్యిని వేసి మిశ్రమం మొత్తాన్ని బాగా కలుపుకోవాలి.

ఆ తర్వాత మీకు నచ్చిన సైజ్‌లో లడ్డూలను చేసుకొని తినడమే.