సీఎం రేవంత్ రెడ్డిపై తీవ్రంగా గా ఆగ్రహం వ్యక్తం చేశారు మాజీ ఎంపీ, బీఆర్ఎస్ సీనియర్ నేత వినోద్ కుమార్. తెలంగాణ ఉద్య‌మం సమయంలో ఉద్యమకారుల పైకి తుపాకీ పెట్టిన రేవంత్ రెడ్డి నా గురించి మాట్లాడితే ఎలా? అని ఫైర్ అయ్యారు. ఇవాళ(గురువారం) హైదరాబాద్ తెలంగాణ భవన్‌లో ఏర్పాటు చేసిన మీడియా సమావేశంలో మాట్లాడిన వినోద్... తాను పదవుల కోసం ఏనాడూ పాకులాడలేదన్నారు. తన చరిత్ర అందరికీ తెలుసునన్నారు. ఎన్నికల్లో పోటీ చేసి ఓడిపోతే కేసీఆర్ తనకు ఉద్యోగం ఇచ్చారని రేవంత్ రెడ్డి వ్యాఖ్యానించడం దారుణంగా ఉందన్నారు.

తెలంగాణ ఉద్యమంలో తాను మొదటి నుంచి ఉన్నానని తెలిపారు వినోద్ కుమార్. తెలంగాణ కోసం ఎంపీగా రాజీనామా చేసి గెలిచానని చెప్పారు. తెలంగాణ కోసం 32 పార్టీలను ఒప్పించేందుకు కేసీఆర్‌తో పాటు కలిసి తాను ప్రయత్నించానన్నారు. ప్లానింగ్ బోర్డు చైర్మన్‌గా తెలంగాణ అభివృద్ధి కోసం కృషి చేసినట్లు చెప్పారు. సీఎం తన గురించి హేళనగా మాట్లాడినందువల్లే తాను స్పందిస్తున్నానన్నారు.

10 ఏండ్ల పాటు  కేసీఆర్ ఎన్నో ఉద్యోగాలు ఇచ్చినప్పటికీ తాము ఇంతలా ప్రచారం చేసుకోలేదని కాంగ్రెస్ పార్టీపై ఆగ్రహం వ్యక్తం చేశారు వినోద్ కుమార్. తాము ఉద్యోగాలు ఇచ్చినప్పుడు నియామక పత్రాలు పోస్టాఫీస్ ద్వారా వెళ్లేవని, కానీ ఇప్పుడు ఎల్బీ స్టేడియంలో ఇస్తున్నారని విమర్శించారు. బీఆర్ఎస్ హయాంలో ఇచ్చిన నోటిఫికేషన్లకు తామే ఉద్యోగాలు ఇచ్చినట్లుగా కాంగ్రెస్ ప్రచారం చేసుకుంటోందని విమర్శించారు. కాంగ్రెస్ పార్టీకి దమ్ముంటే 2 లక్షల ఉద్యోగాలు ఇచ్చాక ప్రచారం చేసుకోవాలని సూచించారు. కేసీఆర్ కారణంగానే  తెలంగాణ వచ్చిందని చెప్పిన రేవంత్ రెడ్డి ఇప్పుడు కొరివిదెయ్యం అనడం మంచిది కాదన్నారు వినొద్ .