పోలీసులు ఎన్ని చర్య లు చేపట్టినా ఎన్ని కఠిన నిర్ణయాలు చేపట్టినా మహిళలకు రక్షణ లేకుండా పోతోంది. సామన్య మహిళలకే కాదు...పోలీసు ఉద్యోగం చేస్తున్న మహిళలకు కూడా రక్షణ కరువైంది. తోటి మహిళా పోలీస్ అధికారి అని చూడకుండా వేధింపులకు పాల్పడుతున్నారు.  పోలీస్ స్టేషన్లో ఉన్న మహిళా ఏఎస్సై పైనే నే ఓ SI వేధింపులకు పాల్పడటంతో  ఆత్మహత్యాయత్నం చేసుకుంది. ఈ ఘటన మెదక్ జిల్లా చిలిప్ చేడ్ పోలీస్ స్టేషన్ లో  జరిగింది.

చిలిప్ చేడ్ పోలీస్ స్టేషన్ లో ఎస్సై యాదగిరి తనపై వేధింపులకు పాల్పడుతున్నాడని మహిళా ఏఎస్సై పోలీస్ స్టేషన్లోనే ఆత్మహత్యాయత్నానికి పాల్పడింది. ఆమె సోదరుడు జిల్లా ఎస్పీకి ఫోన్ చేసి కంప్లైంట్ చేయడంతో విషయం బయటపడింది. తమ స్టేషన్ ఎస్సై యాదగిరి తనకు రెండురోజులు కంటిన్యూగా డ్యూటీ వేసి.. ఒకరోజు రెస్ట్ తీసుకుంటే ఆబ్సెంట్ వేస్తున్నాడని, ఆయనకు లొంగకపోతే ఇలా మానసిక వేధింపులకు గురిచేస్తున్నాడని బాధితురాలు లేఖలో తెలిపింది. అందరినీ ఒకలా, తనను మరోలా చూస్తున్నాడని.. ప్రతి చిన్నదానికి ఆబ్సెంట్ వేస్తానని బెదిరిస్తున్నాడని ఆవేదన వ్యక్తం చేసింది.

అంతేకాదు.. తనకు ఎలాంటి అఘాయిత్యం జరిగినా.. అందుకు కారణం ఎస్సై యాదగిరినే అని లేఖలో తెలిపింది. మహిళా పోలీసులను లొంగదీసుకోవాలని వేధించే అతడిని ఎట్టి పరిస్థితుల్లోనూ వదలొద్దని.. కఠినంగా శిక్షించాలని కోరింది మహిళా ఏఎస్సై. ఎస్సై యాదగిరి పై కఠిన చర్యలు చేపట్టాలని బాధితురాలి కుటుంబ సభ్యులు పోలీసులు ఉన్నతాధికారులను కోరుతున్నారు.