కుటుంబం ఆరోగ్యంగా ఉంటే, గ్రామం ఆరోగ్యంగా ఉంటుంది. గ్రామం ఆరోగ్యంగా ఉంటే మండలం, జిల్లా, రాష్ట్రం, దేశం ఆరోగ్యవంతంగా ఉంటాయి. మంచి ఆరోగ్యం కోసం పోషకాహారం చాలా అవసరం. ఈ నేపథ్యంలో ఐసీడీఎస్ ఆధ్వర్యంలో పోషకాహారంపై అవగాహన కల్పిస్తున్నారు. జగిత్యాల జిల్లా మల్యాల మండలం బల్వంతాపూర్‌లో పోషణ్ అభియాన్‌లో భాగంగా పోషణ పక్వాడాను నిర్వహించారు. ఈ కార్యక్రమానికి ముఖ్య అతిథిగా హాజరైన సీడీపీవో వీరలక్ష్మి మాట్లాడుతూ.. పురుషులకు వంటపై అవగాహన ఉండాలని, తినే ఆహారంలో పోషకాలు ఏ స్థాయిలో ఉన్నాయనేది తెలియాల్సిన అవసరం ఉందని తెలిపారు. కుటుంబాన్ని ఆరోగ్యవంతంగా ఉంచుకొనేందుకు పురుషులు పోషకాహారాల గురించి తెలుసుకోవాలని సూచించారు. ఈ కార్యక్రమంలో ఐసీడీఎస్ సూపర్‌వైజర్ పవిత్ర, ఏడబ్ల్యూటీఎస్ నిర్మల, స్వప్న, జలజ, ఏఎన్ఎం స్వరూప, ఆశావర్కర్లు శ్రీలత, సుమలత తదితరులు పాల్గొన్నారు.