పిల్ల చేష్టలు, గారడీ మాటలతో రాష్ట్రాన్ని సీఎం రేవంత్ రెడ్డి ఆగం చేస్తున్నాడని భారతీయ రాష్ట్ర సమితి వర్కింగ్ ప్రెసిడెంట్ కల్వకుంట్ల రామారావు విమర్శించారు. ఈ మేరకు ట్విట్టర్ వేదికగా ఆయన ఆరోపించారు.  కొడంగల్ ఫార్మాసిటీ కాదని, పారిశ్రామిక వాడ అంటూ సీఎం రేవంత్ రెడ్డి తనను కలిసిన కమ్యూనిస్టు నేతలతో చేసిన వ్యాఖ్యలపై ఈ మేరకు కేటీఆర్ స్పందించారు. లక్ష్యం లేని చర్యలతో రాష్ట్రాన్ని ఆగం చేస్తున్నావంటూ రేవంత్ రెడ్డిని విమర్శించారు. రేవంత్ రెడ్డి నాలుకకు నరం లేదని, ఏదైనా మాట్లాడుతారంటూ ఆరోపించారు. రేవంత్ రెడ్డిది నోరైతే నిజాలు వస్తాయని, అదే మూసీ అయితే మాయమాటలే వస్తాయని కేటీఆర్ ఎద్దేవా చేశారు. కాంగ్రెస్ ప్రభుత్వం విడుదల చేసిన గెజిట్ నోటిఫికేషన్ కొడంగల్ లో భూసేకరణ ఫార్మా విలేజ్ ల కోసం అని స్పష్టంగా వెల్లడిస్తోందని, ఆయన రేవంత్ రెడ్డి కల్లబొల్లి మాటలు చెబుతున్నారని విమర్శించారు.

ఫార్మా క్లస్టర్ ఏర్పాటు చేస్తామని పలుమార్లు, పలు వేదికల మీద ప్రకటనలు చేసిన విషయాన్ని మర్చిపోయావా.? అంటూ కేటీఆర్ నిలదీశారు. తొండలు గుడ్లు పెట్టని భూములు  అంటూ బాతాఖానీ కొడితివని, మీ అన్న తిరుపతి  లగచర్ల చుట్టుపక్కల గ్రామాలలో తిరిగి ప్రైవేటు సైన్యంతో, పోలీసు బలగాలతో కలిసి భూములు ఇవ్వాలని రైతులను బెదిరించలేదా.? అని కేటీఆర్ ప్రశ్నించారు. ఎదురు తిరిగిన రైతుల మీద అక్రమ కేసులు పెట్టిన మాట వాస్తవము కాదా అని నిలదీసిన కేటీఆర్.. రైతులను జైళ్లకు పంపి అక్రమ నిర్భంధం, అణచివేత కొనసాగించడం లేదా.? అని ప్రశ్నించారు. ఇంత చేస్తూ ఇప్పుడు అక్కడ పెట్టేది ఫార్మా సిటీ కాదని,  ఇండస్ట్రియల్ కారిడార్ అంటూ మాటమార్చి ఎవర్నీ పిచ్చోళ్లను చేస్తున్నావ్ రేవంత్ రెడ్డి అంటూ కేటీఆర్ ప్రశ్నించారు. చెప్పెటోడికి వినేవాడు లోకువ అన్నట్టుగా రేవంత్ రెడ్డి వ్యవహార శైలి ఉందని, అబద్దాలతో అధికారంలోకి వచ్చిన నువ్వు అబద్దాలతోనే కాపురం చేస్తూ కాలం వెల్లదీస్తున్నావంటూ కేటీఆర్ దుయ్యబట్టారు.