లక్నో : దేశద్రోహుల భరతం పట్టేలా ఉత్తర ప్రదేశ్‌లోని యోగి ఆదిత్యనాథ్ సర్కారు సంచలన నిర్ణయం తీసుకుంది. దేశానికి వ్యతిరేకంగా సోషల్ మీడియాలో పోస్టులు చేసేవారిపట్ల కఠినంగా వ్యవహరించే పాలసీని తీసుకొచ్చింది. దేశానికి వ్యతిరేకంగా పోస్టులు పెడితే జీవితాంతం జైల్లో ఉంచేలా తెస్తున్న పాలసీకి ఆ రాష్ట్ర మంత్రి వర్గం ఆమోదం తెలిపింది. ఫేస్‌బుక్, ఇన్‌స్టాగ్రామ్, యూట్యూబ్ సహా ఇతర సోషల్ మీడియా వేదికల్లో పోస్టులకు ఈ రూల్ వర్తించనుంది. దేశ వ్యతిరేక పోస్టులను నియంత్రించాలనే లక్ష్యంతో ఈ కొత్త పాలసీని తీసుకొచ్చింది. ఈ పాలసీ ప్రకారం.. దేశ వ్యతిరేక కంటెంట్ పెట్టడం తీవ్ర నేరం. ఇలాంటి చర్యలకు పాల్పడితే తక్కువలో తక్కువ 3 ఏళ్ల జైలు శిక్ష పడుతుంది. గరిష్ఠంగా జీవిత ఖైదు, భారీగా జరిమానా విధిస్తారు.

మరోవైపు, సోషల్ మీడియాలో అశ్లీలత, పరువు నష్టం కలిగించే కంటెంట్ ఎక్కువగా పెరుగుతున్నందున.. వారిపై క్రిమినల్ కేసులు పెట్టేలా కొత్త పాలసీలో తీసుకొచ్చింది. దీనికోసం వీ-ఫోరం అనే డిజిటల్ ఏజెన్సీకి బాధ్యతలు అప్పగించి.. సోషల్ మీడియా కంటెంట్‌పై నిఘా ఉంచనుంది. సోషల్ మీడియాలో పోస్ట్ అయ్యే వీడియోలు, కంటెంట్లు, పోస్టులు, ట్వీట్లు, రీల్స్ అన్నీ వీ-ఫోరం నిఘాలో ఉంటాయి.

ఇదిలా ఉండగా, ఉత్తర ప్రదేశ్ ప్రభుత్వ పథకాలు, నిర్ణయాలు, ప్రాజెక్టులు, సర్కారు సాధించిన విజయాల కంటెంట్ సోషల్ మీడియాలో పోస్ట్ చేసి గరిష్ఠంగా రూ.8 లక్షల వరకు సంపాదించవచ్చని యోగి సర్కారు ఆఫర్ ఇస్తోంది. ఈ పాలసీ సోషల్ మీడియా ఇన్‌ఫ్లుయెన్సర్లకు ఉపాధి కల్పిస్తుందని ప్రభుత్వం పేర్కొంది. ట్విట్టర్, ఫేస్‌బుక్, ఇన్‌స్టాగ్రామ్‌లో అయితే.. రూ.5 లక్షల వరకు, యూట్యూబ్‌లో అయితే రూ.8 లక్షల వరకు సంపాదించుకొనే వీలుందని వెల్లడించింది.