Driving License | డ్రైవింగ్ లైసెన్స్ కావాలంటే ఆర్టీవో కార్యాలయానికి వెళ్లి, డ్రైవింగ్ టెస్ట్ కోసం హాజరు కావాలి. అయితే, ఆర్టీవో కార్యాలయానికి వెళ్లే అవసరం లేకుండానే లైసెన్స్ వస్తే...? ఆ దిశగా కేంద్రం కసరత్తు చేసింది. ఆర్టీవో కార్యాలయానికి వెళ్లే అవసరం లేకుండానే ప్రైవేట్ సంస్థలు కూడా డ్రైవింగ్ టెస్టులు నిర్వహించి, సర్టిఫికెట్ జారీ చేసే విధానాన్ని కేంద్ర ప్రభుత్వం అందుబాటులోకి తీసుకొచ్చింది. ఈ మేరకు కొత్త నిబంధనలు జారీ చేసింది. ఆ నిబంధనలు జూన్ 1వ తేదీ నుంచి అమల్లోకి రానున్నాయి. నిబంధనల ప్రకారం అర్హతలు ఉన్న ప్రైవేటు సంస్థలకు డ్రైవింగ్‌ టెస్టు చేసే అధికారం ఉంటుంది.

ప్రైవేట్ కేంద్రాల్లో ఉండాల్సిన సదుపాయాలు:

- ఫోర్‌ వీలర్‌ పరీక్ష నిర్వహించాలంటే ప్రైవేటు డ్రైవింగ్‌ ట్రైనింగ్‌ సెంటర్‌కు కచ్చితంగా 3 ఎకరాల స్థలం ఉండాలి.

- నిబంధనలకు అనుగుణంగా పరీక్ష నిర్వహించేందుకు కావాల్సిన అన్ని సదుపాయాలు ఉండాలి.

- ట్రైనర్లు కచ్చితంగా హైస్కూల్‌ విద్యను పూర్తి చేసుకొని ఉండాలి.

- డ్రైవింగ్‌లో ఐదేండ్లు అనుభవం పొంది ఉండాలి.

- బయోమెట్రిక్స్‌, ఐటీపై ప్రాథమిక అవగాహన ఉండాలి.

డ్రైవింగ్‌ శిక్షణకు ఉండాల్సిన నిబంధనలు: 

- డ్రైవింగ్‌ నేర్పించేందుకు సంబంధించి నిబంధనలు పాటించాలి.

- లైట్‌ వెహికిల్‌ ట్రైనింగ్‌ను కచ్చితంగా 4 వారాల పాటు, కనీసం 29 గంటల పాటు శిక్షణ ఇవ్వాలి.

- ఇందులో ఎనిమిది గంటలు థియరీ, 21 గంటలు ప్రాక్టికల్‌ ఉంటుంది.

- హెవీ మోటార్‌ వాహనాల డ్రైవింగ్‌కు ఆరు వారాల పాటు, కనీసం 39 గంటల ట్రైనింగ్ ఇవ్వాలి.

- ఎనిమిది గంటలు థియరీ, 31 గంటలు ప్రాక్టికల్‌ తరగతులు నిర్వహించాలి.