న్యూఢిల్లీ, ఈవార్తలు : భారతదేశ అత్యున్నత న్యాయస్థానం సుప్రీంకోర్టు తదుపరి ప్రధాన న్యాయమూర్తిగా జస్టిస్ సంజీవ్ కన్నా నియమితులయ్యే అవకాశం ఉన్నది. జస్టిస్ సంజీవ్ ఖన్నా పేరును భారత ప్రధాన న్యాయమూర్తి జస్టిస్ డీవై చంద్రచూడ్ కేంద్రానికి ప్రతిపాదించారు. ఈ మేరకు తన తర్వాత భారత ప్రధాన న్యాయమూర్తిగా జస్టిస్ సంజీవ్ ఖన్నా పేరును సిఫార్సు చేస్తున్నట్టు వెల్లడించారు. ఈ సిఫార్సులకు కేంద్రం ఆమోదం తెలిపినట్లయితే సుప్రీంకోర్టు 51వ సీజేఐగా జస్టిస్ ఖన్నా నియమితులవుతారు. నిబంధనల ప్రకారం.. ఈ ప్రతిపాదనను లేఖ రూపంలో ప్రస్తుత సీజేఐ కేంద్ర న్యాయశాఖకు పంపిస్తారు.

ఆ లేఖను కేంద్ర న్యాయ శాఖ.. దేశ ప్రధానమంత్రి పరిశీలన కోసం పంపిస్తుంది. ఆయన ఆమోదించిన తర్వాత రాష్ట్రపతికి చేరుకుంటుంది. అంతిమంగా రాష్ట్రపతి ఆమోదంతో తదుపరి ప్రధాన న్యాయమూర్తి బాధ్యతలను చేపడతారు. సంప్రదాయం ప్రకారం సీజేఐ తన తర్వా త ఆ పదవిని చేపట్టడానికి ముందు సుప్రీంకోర్టులోని అత్యంత సీనియర్ న్యాయమూర్తి పేరును సిఫార్సు చేస్తారు. అందులో భాగంగానే చంద్రచూడ్.. తర్వాతి సీజేఐగా సంజీవ్ ఖన్నా పేరును ప్రతిపాదించారు.