ఏపీ డిప్యూటీ సీఎం, జనసేన అధినేత పవన్ కళ్యాణ్ పై ఏపీ మంత్రి నారా లోకేష్ ప్రశంసల జల్లు కురిపిస్తున్నారు. తాజాగా ప్రకాశం జిల్లాలో పర్యటించిన నారా లోకేష్ పవన్ కళ్యాణ్ పై కీలక వ్యాఖ్యలు చేశారు. నాకు సోదర సమానుడైన పవన్ కళ్యాణ్ అన్నయ్య అంటూ బహిరంగ సభ వేదికగా పవన్ కళ్యాణ్ ను లోకేష్ ప్రశంసించారు. పవన్ అన్న ఏది అనుకున్న సాధించే వ్యక్తి అంటూ లోకేష్ పేర్కొన్నారు. ప్రతి క్యాబినెట్ మీటింగ్లో తాము చర్చిస్తామని, తాగునీరు తమకు ప్రాధాన్యమైన అంశంగా పవన్ కళ్యాణ్ భావిస్తారని ఈ సందర్భంగా లోకేష్ వ్యాఖ్యానించారు. గత ప్రభుత్వం నిర్లక్ష్యంతో వెలుగొండ ప్రాజెక్టు నిలిచిపోయిందని, దానికి పవన్ కళ్యాణ్ కేంద్రంతో మాట్లాడి నిధులు తీసుకువచ్చారంటూ కొనియాడారు మంత్రి లోకేష్. త్వరలోనే ఆగిపోయిన పనులను ప్రారంభించి ప్రతి గడపకు మంచినీటిని అందిస్తామని స్పష్టం చేశారు. ఈ సందర్భంగా వైసీపీ పైన మంత్రి నారా లోకేష్ తీవ్రస్థాయిలో విమర్శలు గుప్పించారు. ప్రభుత్వంపై ఇష్టం వచ్చినట్లు విమర్శలు చేసే వారి పైన రెడ్ బుక్ ఓపెన్ చేస్తామని హెచ్చరించారు. అయితే ఈ సమావేశంలో మంత్రి నారా లోకేష్ డిప్యూటీ సీఎం పవన్ కళ్యాణ్ పై ప్రశంసలు జల్లు కురిపించడంపై అనేక అనుమానాలు వ్యక్తమవుతున్నాయి. పవన్ కళ్యాణ్ తో నారా లోకేష్ కు విభేదాలు ఉన్నట్లు బయట పెద్ద ఎత్తున ప్రచారం జరుగుతోంది. పవన్ కళ్యాణ్ కు, మంత్రి నారా లోకేష్ కు పడదన్న ఆరోపణలు ఉన్నాయి. ఈ ఆరోపణలకు బ్రేక్ చెప్పేందుకు నారా లోకేష్ తాజాగా ఈ వ్యాఖ్యలు చేసినట్లు చెబుతున్నారు.

గత కొద్ది రోజులుగా నారా లోకేష్ కు చెందిన టీమ్, జనసైనికులు మధ్య తీవ్రస్థాయిలోనే సోషల్ మీడియాలో వార్ జరుగుతుంది. నారా లోకేష్ ను డిప్యూటీ సీఎం చేయాలంటూ టిడిపికి చెందిన కార్యకర్తలు డిమాండ్ చేస్తుండగా.. పవన్ కళ్యాణ్ సీఎం కావాలన్నా డిమాండ్ ను జన సైనికులు వ్యక్తం చేస్తూ వచ్చారు. ఈ తరహా డిమాండ్లు తెరపైకి వస్తుండడంతో రాజకీయంగా అనిచ్చితి నెలకొనే పరిస్థితి ఏర్పడుతుందన్న భావన రెండు పార్టీలకు చెందిన కీలక నాయకుల్లోను వ్యక్తం అయింది. ముఖ్యంగా రానున్న ఎన్నికల్లోను కలిసే పోటీ చేయాలన్న భావనలో డిప్యూటీ సీఎం పవన్ కళ్యాణ్ ఉన్నారు. దీనికి టిడిపికి చెందిన కొంతమంది నాయకులు, కార్యకర్తలు భిన్నంగా వ్యవహరిస్తున్నారన్న ఆరోపణలు జనసైనికుల నుంచి వస్తున్నాయి. పవన్ కళ్యాణ్ త్యాగం చేసి మరి చంద్రబాబును సీఎం చేశారని, డిప్యూటీ సీఎంతో సరిపెట్టుకున్నారని జన సైనికులు పేర్కొంటున్నారు. అయినప్పటికీ కొంతమంది టీడీపీ నాయకులు, కార్యకర్తలు.. పవన్ కళ్యాణ్ ను ఇంకా తక్కువ చేసే ప్రయత్నం చేస్తున్నారంటూ ఆరోపణ చేస్తున్నారు. అందులో భాగంగానే కొందరు నారా లోకేష్ ను డిప్యూటీ సీఎం చేయాలన్న డిమాండ్ వినిపిస్తున్నారంటూ జన సైనికులు ఆగ్రహాన్ని వ్యక్తం చేస్తున్నారు. ఒకానొక దశలో టిడిపి కార్యకర్తలు, జనసైనికులు మధ్య సామాజిక మాధ్యమాల్లో తీవ్రస్థాయిలో వాదోపవాదనలు జరిగాయి. ఈ తరహా గొడవలు ఇరు పార్టీల మధ్య సఖ్యతను చెడగొడతాయన్న భావనను ఇరు పార్టీలకు చెందిన అగ్ర నాయకులు వ్యక్తం చేశారు. ఈ నేపథ్యంలోనే పవన్ కళ్యాణ్ కొద్ది రోజుల కిందట మాట్లాడుతూ మరో 15 ఏళ్ల పాటు చంద్రబాబు నాయుడు ముఖ్యమంత్రిగా ఉండాలన్న ఆశాభావాన్ని ఆయన వ్యక్తం చేశారు.

తమ మధ్య ఇదే విధమైన అనుబంధం ఉంటుందంటూ కీలక వ్యాఖ్యలు చేశారు. ఈ క్రమంలోనే మంత్రి నారా లోకేష్ కూడా తాజా వ్యాఖ్యలు చేసినట్లు చెబుతున్నారు. తనను డిప్యూటీ సీఎం చేయాలంటూ కొంతమంది టీడీపీ కార్యకర్తలు డిమాండ్ చేస్తున్న నేపథ్యంలో.. పవన్ కళ్యాణ్ తన అన్న అంటూ వ్యాఖ్యానించడం ద్వారా లోకేష్ అటువంటి డిమాండ్లకు స్వస్తి చెప్పినట్లు అయిందని పేర్కొంటున్నారు. కొద్దిరోజుల కిందట నారా లోకేష్ మాట్లాడుతూ తమ మధ్య గొడవలు ఉంటాయని, అయితే విడాకుల అన్న ప్రశ్న ఉండదంటూ వ్యాఖ్యానించారు. ఇవన్నీ ఇరు పార్టీ నేతల మధ్య అంతర్గతంగా ఉన్న వివాదాలను సద్దుమణిగించే ప్రయత్నంలో భాగంగానే జరుగుతున్నాయి అంటూ పలువురు వ్యాఖ్యానిస్తున్నారు. ఏది ఏమైనా నారా లోకేష్ పవన్ కళ్యాణ్ పై చేస్తున్న వ్యాఖ్యలు ప్రస్తుతం రాజకీయంగా ప్రాధాన్యతను సంతరించుకున్నాయి. మరి మంత్రి నారా లోకేష్ డిప్యూటీ సీఎం పవన్ కళ్యాణ్ పట్ల తాజాగా ప్రదర్శిస్తున్న వైఖరితో జనసైనికులు శాంతిస్తారా.? లేదా.? అన్నది చూడాల్సి ఉంది.