ఏలూరు జిల్లా దెందులూరులో రాజకీయాల్లో హిట్ ఎక్కాయి. ఈ నియోజకవర్గంలోని ప్రస్తుత ఎమ్మెల్యే, మాజీ ఎమ్మెల్యే మధ్య గొడవలు తారాస్థాయికి చేరుకోవడంతో ఇక్కడ ఉద్రిక్త పరిస్థితులు నెలకొన్నాయి. తాజాగా ఎమ్మెల్యే చింతమనేని ప్రభాకర్, మాజీ ఎమ్మెల్యే అబ్బయ్య చౌదరి మీడియాతో మాట్లాడుతూ ఒకరిపై ఒకరు తీవ్రస్థాయిలో వ్యాఖ్యలు చేసుకున్నారు. అసలు ఈ వివాదానికి కారణం ముందు రోజు రాత్రి జరిగిన ఒక పెళ్లిలో జరిగిన గొడవగా చెబుతున్నారు. నియోజకవర్గంలోని ఒక గ్రామంలో జరిగిన పెళ్లికి తాజా ఎమ్మెల్యే, మాజీ ఎమ్మెల్యే హాజరయ్యారు. ప్రస్తుత ఎమ్మెల్యే ప్రభాకర్ ఈ పెళ్లికి వచ్చే సమయానికి మాజీ ఎమ్మెల్యే అక్కడ ఉన్నారు. చింతమనేని ప్రభాకర్ కారు వెళ్లేసరికి అక్కడ మాజీ ఎమ్మెల్యే అబ్బయ్య చౌదరి కారు ఆగి ఉంది. అక్కడ ఏం జరిగిందో తెలియదు కానీ ఎమ్మెల్యే ప్రభాకర్ మాజీ ఎమ్మెల్యే కారు డ్రైవర్ను తీవ్రస్థాయిలో దుర్భాషలాడుతూ ఆగ్రహాన్ని వ్యక్తం చేశారు. ఈ వ్యవహారాన్ని అక్కడే ఉన్న కొందరు వీడియో తీసి సామాజిక మాధ్యమాల్లో పోస్ట్ చేశారు. అది పెద్ద ఎత్తున వైరల్ అయింది. ఈ వ్యవహారం ఒకవైపు రాజకీయాల్లో అలజడ రేకెత్తిస్తుండగా.. అదే రోజు వివాహం నుంచి వస్తున్న సమయంలో తనపై దాడికి యత్నించారు అంటూ అబ్బయ్య చౌదరిపై ప్రస్తుత ఎమ్మెల్యే ప్రభాకర్ ఆరోపణలు చేశారు.

అక్కడితో ఆగకుండా పోలీసులు కూడా తన సెక్యూరిటీ సిబ్బందితో ఫిర్యాదు చేయించారు. ఈ వ్యవహారం ప్రస్తుతం దెందులూరు నియోజకవర్గం లో హాట్ టాపిక్ గా మారింది. ఈ నేపథ్యంలోనే తాజాగా ఇద్దరు నేతలు మీడియాతో మాట్లాడుతూ కీలక వ్యాఖ్యలు చేశారు. ఎమ్మెల్యే చింతమనేని ప్రభాకర్ మాట్లాడుతూ కొంతమంది పోయిన ఉనికిని కాపాడుకోవడానికి సంచలనం సృష్టించేందుకు ప్రయత్నిస్తున్నారని వ్యాఖ్యానించారు. చట్టం ప్రకారం కూటమి ప్రభుత్వం పని చేస్తోందని, కావాలని గొడవ చేస్తే ఊరుకునే పరిస్థితి లేదని వార్నింగ్ ఇచ్చారు. తప్పుంటే కచ్చితంగా చర్యలు తీసుకుంటామని ఎస్పీ చెప్పిన విషయాన్ని ఈ సందర్భంగా ఆయన వెల్లడించారు. ఇదే విషయాన్ని ప్రభుత్వం దృష్టికి, సీఎం చంద్రబాబు నాయుడు, డిప్యూటీ సీఎం పవన్ కళ్యాణ్ దృష్టికి తీసుకువెళ్తామన్నారు. తాను బరస్ట్ అయిన మాట వాస్తవమేనని ఈ సందర్భంగా ఆయన అంగీకరించారు. తన కారుకు అడ్డంపెట్టి, డ్రైవర్ ను, తమ వారిని తిడితే ఊరుకుంటామా అని చింతమనేని పేర్కొన్నారు. తన కారుకు ఎందుకు కారు అడ్డం పెట్టారని ప్రశ్నించానని, వాళ్లు ప్రజల సొమ్ముతో తిరుగుతున్నారని, దొంగల పార్టీ అంటూ విమర్శించారు. సంస్కారహీనుడిగా ప్రవర్తించావని, ఇది ప్రజాస్వామ్యమని, ఖబడ్దార్ అంటూ వ్యాఖ్యానించారు. మీరు ఏదైనా చేస్తుంటే చూస్తూ కూర్చుంటామా అని ప్రశ్నించిన ప్రభాకర్.. తాను డ్రైవర్ను మందలించిన తర్వాతే కారు పక్కకు తీశారని పేర్కొన్నారు. తాను ఎందుకు తిట్టాల్సి వచ్చిందో తన కారుకు కెమెరా ఉందని, కావాలంటే విజువల్స్ ఇస్తానని పేర్కొన్నారు. జగన్ పుణ్యమా వల్ల ఎమ్మెల్యే అయ్యావని, నీది, నీ ఫ్యామిలీది ఒక బతుకా అంటూ మాజీ ఎమ్మెల్యే అబ్బయ్య చౌదరిని ఉద్దేశించి చింతమనేని ప్రభాకర్ తీవ్రస్థాయిలో వ్యాఖ్యానించారు. 

విధ్వంస పాలన సాగుతూ ఉందంటూ విమర్శించిన అబ్బయ్య చౌదరి 

దెందులూరు మాజీ ఎమ్మెల్యే అబ్బయ్య చౌదరి మాట్లాడుతూ ఎమ్మెల్యే చింతమనేని ప్రభాకర్ పై తీవ్రస్థాయిలో ఆగ్రహాన్ని వ్యక్తం చేశారు. వైసిపి కార్యకర్తలు, నాయకులపై చింతమనేని ప్రభాకర్ కక్ష సాధింపు చర్యలకు పాల్పడుతున్నారని ఆరోపించారు. జరుగుతున్న పరిణామాలు చూస్తుంటే తనను, తన కుటుంబాన్ని అంతమొందించాలని కుట్ర జరుగుతున్నట్టుగా అనుమానం కలుగుతోందని పేర్కొన్నారు. కారు పార్కింగ్ దగ్గర ఏర్పడిన చిన్న వివాదంలో తమ డ్రైవర్, కార్యకర్తలపై చింతమనేని దాడికి పాల్పడ్డారని పేర్కొన్నారు. కొల్లేరులో అవినీతికి పాల్పడ్డాడని శ్రీపర్రు గ్రామానికి చెందిన కొంతమంది వ్యక్తులను తన ఇంటికి పంపించి డాన్సులు చేస్తున్నాడని, చింతమనేని ఒక ప్రజా ప్రతినిధిన అనే సంగతి మరిచి బూతులు తిట్టడం మంచి సంప్రదాయం కాదని అబ్బాయి చౌదరి వ్యాఖ్యానించారు. ఈ తరహా చర్యలు మానుకోవాలని హితవు పలికారు.