భారత ప్రధాన మంత్రి నరేంద్ర మోడీకి అరుదైన గౌరవం దక్కింది.  ఉత్తరా అమెరికా ఖండంలోని కరేబియన్ ప్రాంతంలోని డొమినికా భారత ప్రధాని నరేంద్ర మోడీకి తమ దేశ అత్యున్నత జాతీయ అవార్డును ప్రకటించింది. ఈ మేరకు డొమినికా ప్రభుత్వం గురువారం ఒక ప్రకటనను విడుదల చేసింది. కరోనా సమయంలో భారత్ డొమినికాకు అందించిన సహాయానికిగాను ఆదేశం ప్రధాన మోడీకి ఈ అవార్డును ప్రధానం చేస్తున్నట్లు ప్రకటించింది. భారత్ - డొమినికా మధ్య సంబంధాలను బలోపేతం చేయడంలో ప్రధాని మోడీ చేసిన కృషిని ఈ సందర్భంగా ఆ దేశం కొనియాడింది. దీనికి గుర్తుగా ప్రధాని మోదీకి ఈ అత్యున్నత జాతీయ అవార్డును అందిస్తున్నట్లు పేర్కొంది. ప్రధాని మోదీకి డొమినికా ప్రభుత్వం 'డొమినికా అవార్డు ఆఫ్ హానర్' అవార్డును ప్రధానం చేయనుంది. వచ్చే ఏడాది గయానాలోని జార్జ్ టౌన్ లో జరిగే ఇండియా - కరికొమ్ సమ్మిట్ సందర్భంగా కామన్వెల్త్ ఆఫ్ డొమినికా అధ్యక్షురాలు సిల్వానీ బర్టన్ ఈ అవార్డును అందించనున్నారు.

2021లో ప్రధాన మోడీ డొమినికాకు 70 వేల డోసుల ఆస్ట్రాజనిక కోవిడ్ 19 వ్యాక్సిన్లను అందించారు. ఈ వ్యాక్సిన్ వల్ల తమ పొరుగు దేశాలకు అండగా నిలవగలిగామని, ప్రధాన మోడీ నేతృత్వంలో ఆరోగ్యం, విద్య, ఐటీ రంగంలో భారత్ తమకు మద్దతు అందిస్తుందంటూ ఆదేశం ప్రకటించింది. భారత్ తమకు గొప్ప భాగస్వామి అని, అందుకే ఆ దేశ ప్రధాని తమ అత్యున్నత పురస్కారంతో సత్కరించాలని నిర్ణయించుకున్నామని డొమినికా ప్రధానమంత్రి కార్యాలయం ఒక ప్రకటనలో పేర్కొంది. డొమినికా ప్రభుత్వం అందజేయనున్న ఈ పురస్కారం పట్ల భారత విదేశాంగ శాఖ హర్షాన్ని వ్యక్తం చేసింది. గడిచిన కొన్నాళ్లుగా ప్రధాన మోడీ అనేక దేశాలతో సత్సంబంధాలను కొనసాగిస్తున్నారంటూ పేర్కొంది. ఈ అవార్డు పట్ల అంతర్జాతీయ వ్యవహారాలను పర్యవేక్షిస్తున్న నిపుణులు కూడా సానుకూలతలు వ్యక్తం చేస్తున్నారు. ప్రధాన మోడీ ఇతర దేశాలతో నెరపుతున్న సంబంధాలకు దీనిని ప్రతీకగా చెప్పవచ్చు అంటూ పలువురు వ్యాఖ్యానిస్తున్నారు.