ఆస్ట్రేలియా స్టార్‌ క్రికెటర్‌ సినిమాల్లోకి ఎంట్రీ ఇస్తున్నాడు. క్రికెటర్‌గా తనకంటూ ప్రత్యేక గుర్తింపు తెచ్చుకున్న వార్నర్‌కు తొలి నుంచి సినిమాలు అంటే ఎంతో ఇష్టం. ఆస్ట్రేలియా క్రికెటర్‌గా ఉన్న సమయంలో డేరింగ్‌ ఓపెనర్‌గా పేరు గాంచాడు. ఐపీఎల్‌లో సన్‌ రైజర్స్‌ హైదరాబాద్‌ జట్టుకు ఆడిన వార్నర్‌ తెలుగు వారి అభిమానాన్ని చూరగొన్నాడు. డేవిడ్‌ వార్నర్‌ను తెలుగు ప్రజలు కూడా తమ వాడిగా ఓన్‌ చేసుకున్నారు. వార్నర్‌ కూడా వీలు చిక్కినప్పుడల్లా తెలుగులో స్పందిస్తూ తన అభిమానాన్ని చాటుతూ వచ్చాడు. అనేక సందర్భాల్లో పుష్ప సినిమాలోని మేనరిజాన్ని ప్రదర్శిస్తూ ఎంతో మందిని ఆకట్టుకున్నాడు. ఈ క్రమంలోనే సినిమా పట్ల వార్నర్‌కు ఉన్న ఆసక్తిని గమనించిన దర్శకుడు ఆయనకు సినిమాలో నటించే అవకాశాన్ని కల్పించారు. యంగ్‌ హీరో నితిన్‌, శ్రీలీల జంటగా నటిస్తున్న రాబిన్‌ హుడ్‌ సినిమాలో వార్నర్‌ కీలక పాత్రలో నటించే అవకాశాన్ని కల్పించారు. తాజాగా ఈ సినిమాకు సంబంధించిన ప్రమోషన్‌ చిత్ర యూనిట్‌ చేపట్టింది.

ప్రమోషన్‌ కార్యక్రమానికి వార్నర్‌ కూడా హాజరయ్యాడు. దీంతో ఈ సినిమా పట్ల సర్వత్రా ఆసక్తి నెలకొంది. డేవిడ్‌ వార్నర్‌ ఎటువంటి రోల్‌లో యాక్ట్‌ చేశాడన్న దానిపై సర్వత్రా ఆసక్తి నెలకొంది. మరోవైపు ఈ సినిమాకు వార్నర్‌ ఎంత చార్జ్‌ చేశాడన్న దానిపై జోరుగా చర్చ జరుగుతోంది. డేవిడ్‌ వార్నర్‌ తీసుకున్న రెమ్యునరేషన్‌కు సంబంధించిన ఒక వార్త ప్రస్తుతం సామాజిక మాధ్యమాల్లో తెగ వైరల్‌ అవుతోంది. ఈ సినిమాలో వార్నర్‌ కేవలం రెండు నిమిషాల 50 సెకండ్లు మాత్రమే కనిపిస్తారు. ఈ మేరకు ఒక పాత్రను క్రియేట్‌ చేశారు. ఈ పాత్ర సినిమాలో అత్యంత కీలకమైనదిగా చెబుతున్నారు. ఈ పాత్రలో నటించేందుకు డేవిడ్‌ వార్నర్‌కు ఏకంగా రూ.2.25 కోట్లు రూపాయల పారితోషికాన్ని చిత్ర యూనిట్‌ చెల్లించినట్టు చెబుతున్నారు. ప్రస్తుతం ఈ న్యూస్‌ నెట్టింట తెగ వైరల్‌ అవుతోంది. కొద్ది నిమిషాలకే అంత భారీ రెమ్యునరేషనా అంటూ పలువురు ముక్కున వేలేసుకుంటున్నారు. ఈ సినిమాలో నటులు రాజేంద్ర ప్రసాద్‌, వెన్నెల కిషోర్‌, బ్రహ్మాజీ కీలక పాత్రలు పోషిస్తున్నారు.