భారతీయ జనతా పార్టీకి కొత్త జాతీయ అధ్యక్షుడు నియమితులు కానున్నారు. వచ్చేనెల 10వ తేదీ నుంచి 20వ తేదీ లోపు పార్టీ అధ్యక్షుడి ఎన్నిక జరగనుంది. గడిచిన కొన్నాళ్లుగా బిజెపికి కొత్త జాతీయ అధ్యక్షుడు వస్తాడు అన్న ప్రచారం జరుగుతోంది. ఈ ప్రచారం నేపథ్యంలోనే ఆ పార్టీ ముఖ్య నేతలు కూడా దీనిపై స్పందించారు. బిజెపికి కొత్త అధ్యక్షుని ఎన్నుకోవాలి అన్న నిర్ణయాన్ని ఇప్పటికే తీసుకున్నట్లు చెబుతున్నారు. ప్రస్తుత అధ్యక్షుడు జేపీ నడ్డా ఢిల్లీ ఎన్నికల వరకు బిజెపికి సారధ్యం వహిస్తారు. ఆ తర్వాత కొత్త నేతకు ఈ బాధ్యతలను అప్పగించనున్నారు. జేపీ నడ్డా పదవీకాలం గడిచిన ఏడాది జనవరితో ముగిసింది. అయితే గడిచిన ఏడాదిలోనే లోక్సభకు ఎన్నికలు ఉండడంతో నడ్డాను బిజెపి అగ్రనాయకత్వం అధ్యక్షుడిగా కొనసాగించింది. ఎన్నికల ఫలితాలు వెలువడి ఆరునెలలు దాటుతున్నప్పటికీ ఆయనే అధ్యక్షుడిగా కొనసాగుతున్నారు. ఈ నేపథ్యంలో వచ్చే నెలాఖరు నాటికి కొత్త అధ్యక్షుని నియమించాలన్న నిర్ణయానికి బిజెపి అగ్ర నాయకత్వం వచ్చినట్లు తెలుస్తోంది. ప్రధానమంత్రి నరేంద్ర మోడీ, రాష్ట్రీయ స్వయం సేవక్ సంఘ్ (ఆర్ఎస్ఎస్) చీఫ్ మోహన్ భగవత్ ఆమోదంతో బిజెపి కొత్త జాతీయ అధ్యక్షుడిని ఎంపిక చేయనుంది. ఈ రేసులో పలువురు పేర్లు వినిపిస్తున్నాయి. బిజెపి నుంచి అధికారిక ప్రకటన వెలువడనప్పటికీ ఎవరి స్థాయిలో వారు ప్రయత్నాలను సాగిస్తున్నారు. ఈ రేసులో కేంద్రమంత్రి మనోహర్లాల్ కట్టర్, శివరాజ్ సింగ్ చౌహన్, పార్టీ ప్రధాన కార్యదర్శి వినోద్ తావ్డే పేర్లు వినిపిస్తున్నాయి.

వీరితోపాటు రక్షణ శాఖ మంత్రి రాజ్ నాథ్ సింగ్ పేరు కూడా ప్రముఖంగా వినిపిస్తోంది. వీరిలో ఎవరో ఒకరు బిజెపి జాతీయ అధ్యక్షుడిగా బాధ్యతలు స్వీకరించే అవకాశం ఉందని చెబుతున్నారు. గత సంస్థాగత ఎన్నికల్లో కూడా ధర్మేంద్ర ప్రధాన్, భూపేంద్ర యాదవ్ పేర్లు చర్చకు వచ్చిన చివరకు ఆ పాత్రను జేపీ నడ్డాకు అప్పగించారు. ఈ ముగ్గురు నేతలు పార్టీలో పని చేయడం ద్వారా అనుభవం సంపాదించుకున్నారు. భూపేంద్ర యాదవ్ స్వస్థలం రాజస్థాన్ కాగా.. ధర్మేంద్ర ప్రధాన్ ఒడిశా నుంచి వచ్చారు. వినోద్ తావ్డే మహారాష్ట్రకు చెందిన వారు. ఈ ముగ్గురు నేతలు అమిత్ షాకు సన్నిహితులుగా భావిస్తున్నారు. పార్టీ రాజ్యాంగం ప్రకారం కనీసం 15 ఏళ్ల పాటు పార్టీలో సభ్యత్వం ఉన్న వ్యక్తులు మాత్రమే జాతీయ అధ్యక్షుడిగా చేస్తారు. బిజెపి జాతీయ అధ్యక్షుడు ఎంపిక కోసం సంస్థ గత ఎన్నికల ప్రక్రియ ప్రారంభమైంది. ప్రస్తుతం జాతీయ కౌన్సిల్, రాష్ట్ర కౌన్సిల్ సభ్యుల ఎంపిక జరుగుతోంది. కనీసం 50% రాష్ట్ర యూనిట్లు జాతీయ అధ్యక్షుని ఎన్నికలకు ముందే తన సంస్థ ఎన్నికలను పూర్తిచేయాలని పార్టీ నిర్ణయించింది. ఇప్పటివరకు కేవలం నాలుగు రాష్ట్రాలు మాత్రమే తమ రాష్ట్రాల అధ్యక్షులు ఎంపిక ప్రక్రియను పూర్తి చేశాయి.