బంగ్లాదేశ్‌లో పరిస్థితి నానాటికీ దిగజారుతోంది. హింసాత్మక ఘటనలు పెరుగుతుండటంతో ప్రధాని షేక్ హసీనా రాజీనామా చేసినట్లు వార్తలు వస్తున్నాయి. పెద్ద సంఖ్యలో ఆందోళనకారులు ప్రధాని నివాసానికి చేరుకున్నారు. అటు ఆందోళనకారులు రహదారులను దిగ్బంధనం చేశారు.  ఇంటర్నెట్ పూర్తిగా నిలిచిపోయింది. సోషల్ మీడియా ప్లాట్‌ఫారమ్‌లు 'ఫేస్‌బుక్', 'మెసెంజర్', 'వాట్సాప్', 'ఇన్‌స్టాగ్రామ్'లను కూడా మూసివేయాలని ప్రభుత్వం ఆదేశించింది.దీనికి ఒక రోజు ముందు, ప్రధాని షేక్ హసీనా రాజీనామా చేయాలని డిమాండ్ చేస్తున్న నిరసనకారులు, అధికార పార్టీ మద్దతుదారుల మధ్య దేశంలోని వివిధ ప్రాంతాల్లో ఘర్షణలు చెలరేగాయి. ఈ ఘర్షణల్లో 100 మందికి పైగా చనిపోయారు. 'వివక్షకు వ్యతిరేకంగా విద్యార్థులు' పేరుతో నిర్వహించిన 'సహకార నిరాకరణ కార్యక్రమంలో' పాల్గొనేందుకు నిరసనకారులు ఆదివారం ఉదయం వచ్చినప్పుడు ఘర్షణలు చోటుచేసుకున్నాయి. అవామీ లీగ్, ఛత్రా లీగ్ , జుబో లీగ్‌ల కార్మికులు వారిని వ్యతిరేకించడంతో ఇరుపక్షాల మధ్య ఘర్షణ జరిగింది.

మరోవైపు రాజధాని ఢాకా సహా దేశమంతటా సైన్యాన్ని మోహరించారు. పోలీసులను వీధుల నుంచి తొలగించారు. బంగ్లాదేశ్‌లో నిరంతరంగా దిగజారుతున్న పరిస్థితుల మధ్య, ఆర్మీ చీఫ్ జనరల్ వకార్-ఉజ్-జమాన్ దేశాన్ని ఉద్దేశించి ప్రసంగించవచ్చు. దేశవ్యాప్తంగా కర్ఫ్యూను ధిక్కరిస్తూ వేలాది మంది నిరసనకారులు లాంగ్ మార్చ్ కోసం ఢాకాలోని షాబాగ్ కూడలి వద్ద గుమిగూడారు. అంతకుముందు, ఆదివారం జరిగిన హింసలో 100 మందికి పైగా మరణించారు.