ఉన్నత చదువులు కోసం విదేశాలకు వెళ్లే భారతీయ విద్యార్థుల ఆలోచన విధానంలో మార్పు వచ్చింది. ఎక్కువమంది విద్యార్థులు అమెరికా, ఇంగ్లాండ్ వంటి దేశాలకు ఇప్పటి వరకు ఉన్నత చదువులు కోసం వెళుతూ వస్తున్నారు. అయితే, ఈ దేశాల వైపు వెళ్లే విద్యార్థుల సంఖ్య తగ్గుతూ వస్తోంది. ప్రత్యామ్నాయంగా ఆస్ట్రేలియా, జర్మనీ వంటి దేశాల వైపు భారతీయ విద్యార్థులు చూస్తున్నారు. దీనికి ఆయా దేశాల్లో విధిస్తున్న కఠిన వీసా బంధనలు వంటి కారణాలుగా చెబుతున్నారు. అనేక దేశాలు తమ ఇమిగ్రేషన్ విధానాలను సవరిస్తూ వస్తున్నాయి కొన్ని దేశాలు నిబంధనలను సడలిస్తుంటే.. మరికొన్ని కొత్తగా పరిమితులు విధిస్తున్నాయి. ఈ మార్పుల ప్రభావంతో విదేశాల్లో ఉన్నత చదువులు అభ్యసించాలనుకునే భారతీయ విద్యార్థులపై ప్రభావం పడుతుంది. కొన్నేళ్లుగా దేశ విద్యార్థులను అమెరికా, యూకే, కెనడా, ఆస్ట్రేలియా గమ్య స్థానాలుగా ఉన్నాయి. చదువు పూర్తి అయిన తర్వాత ఉపాధితోపాటు శాశ్వత నివాసానికి అవకాశం కల్పించే దేశాల వరకు ప్రస్తుతం విద్యార్థులు ఎక్కువగా మొగ్గు చూపుతున్నారు.

ఈ విషయంలో ఆస్ట్రేలియా, కెనడా, జర్మనీ దేశాలు భారతీయ విద్యార్థులకు ఆకర్షణీయమైన ఎంపికగా మారుతున్నాయి. దీనికి విరుద్ధంగా అమెరికా, యుకె ఈ ప్రక్రియలను సరళతరణం చేయడంలో సవాళ్లను ఎదుర్కొంటున్నాయి. ఒకప్పుడు భారతీయ విద్యార్థులకు మొదటి ఎంపికగా ఉన్న అమెరికాలో కొంతకాలంగా దరఖాస్తులు తగ్గుతూ వస్తున్నాయి. సంక్లిష్టమైన వీసా నిబంధనలు, పెరుగుతున్న తిరస్కరణ రేట్లు, ఉద్యోగ భద్రతపై ఆందోళనలు వంటి అంశాలు విద్యార్థులను పునరాలోచనలో పడేస్తున్నాయి. ట్రంప్ మళ్లీ అధికారంలోకి రావడంతో భారతీయ విద్యార్థులకు మరింత అనుకూలమైన ఇమిగ్రేషన్ విధానాలు, గ్రీన్ కార్డు జారీలో సడలింపులు ఇస్తారన్న ఆశాభావం వ్యక్తమవుతోంది. మరోవైపు స్నేహపూర్వక వీసా విధానాలు, బలమైన మౌలిక సదుపాయాలతో భారతీయ విద్యార్థులకు కెనడా చాలాకాలంగా కీలక గమ్య స్థానంగా ఉంది. అయితే కఠినమైన ఇమిగ్రేషన్ నిబంధనలు, పరిమితమైన అనుమతులు, దరఖాస్తుల క్షీణతకు కారణమవుతున్నాయి. ఈ సవాళ్ళు ఉన్నప్పటికీ 2024లో 4,37,000 స్టడీ పర్మిట్లను కేటాయించడం అంతర్జాతీయ విద్య పట్ల కెనడా నిబద్ధతకు నిదర్శనంగా నిపుణులు పేర్కొంటున్నారు. భారతీయ విద్యార్థుల పట్ల యూకే మిశ్రమ వైఖరి కనపరిచింది. గ్రాడ్యుయేట్ విద్యార్థులు చదువులు పూర్తి చేసిన తర్వాత రెండేళ్లపాటు పనిచేయడానికి కూడా అనుమతి ఇస్తుంది. పీజీ విద్యార్థులు డిపెండెంట్లను తీసుకురావడంపై ఆంక్షలు విధించడం వారిని కలవరపెడుతోంది. విపరీతమైన రద్దీ వనరుల కేటాయింపులో ఎదురవుతున్న సమస్యలను పరిష్కరించడంలో భాగంగా 2025 నాటికి విదేశీ విద్యార్థుల నమోదును 2,70,000కు పరిమితం చేయాలని ఆస్ట్రేలియా ప్రభుత్వం నిర్ణయించింది.

ఆస్ట్రేలియా వర్సిటీలో సీట్ల కోసం పోటీ మరింత పెరిగినప్పటికీ కెనడా తరహాలో పొడిగించిన పోస్ట్ స్టడీ వర్క్ ప్రయోజనాలు విద్యార్థులను ఊరిస్తున్నాయి. అదే సమయంలో జర్మనీ కూడా భారతీయ విద్యార్థులకు అత్యుత్తమ ఎంపికగా మారుతుంది. పోస్ట్ స్టడీ వర్క్ ఎంపికలు ప్రధాన ఆకర్షణగా మారాయి. నాణ్యమైన విద్యతోపాటు ఉపాధి అవకాశాలను పెంపొందిస్తూ నైపుణ్యం కలిగిన ఉద్యోగులకు ఏటా తొమ్మిది వేల వీసాలు జారీ చేయాలని ఆ దేశం యోచిస్తోంది. వీసా నిబంధనల్లో మార్పులతో విద్యార్థులు సంప్రదాయ గమ్య స్థానాలను పక్కనపెట్టి ప్రాన్స్, ఐర్లాండ్, ఫిన్లాండ్ తదితర దేశాల ప్రత్యామ్నాయాలను అన్వేషిస్తున్నారు. మరోవైపు న్యూజిలాండ్ ప్రభుత్వం అక్రిడేటెడ్ ఎంప్లాయియర్ వర్క్ వీసా నిబంధనలను సవరించింది. సగటు వేతన పరిమితిని తొలగించడం, వలసదారులకు పని అనుభవాన్ని మూడేళ్ల నుంచి రెండేళ్లకు తగ్గించడం, కొత్తగా సీజనల్ దేశాలను ప్రవేశ పెట్టడం వంటి మార్పులు వచ్చే జనవరి నుంచి నాలుగు దశల్లో అమల్లోకి రానుంది. తాజా సవరణలతో ఎంప్లాయర్ అక్రిడిటేషన్ కోసం సగటు ప్రాసెసింగ్ సమయం 62 రోజుల నుంచి 14 రోజులకు తగ్గింది.  ఉద్యోగుల సగటు వేతన పరిమితిని వచ్చే మార్చిలో తొలగించనున్నారు. ఈ మార్పుల ప్రభావం ప్రస్తుత ఉపాధి ఒప్పందాలపై ఉండదు. నివాస అనుమతుల కోసం దరఖాస్తు చేసుకోవడానికి ఉద్యోగులు తప్పనిసరిగా సంపాదించాల్సిన వేతనంలో మార్పు లేదు.