రాష్ట్రంలో సార్వత్రిక పోలింగ్ అనంతరం జరిగిన గొడవలను తమ పార్టీపై పెట్టేందుకు టిడిపి కుట్రపూరితంగా వ్యవహరిస్తోందని మంత్రి పెద్దిరెడ్డి రామచంద్రారెడ్డి విమర్శించారు. తిరుపతిలో మీడియాతో మాట్లాడిన ఆయన టిడిపి వైఖరిపై తీవ్ర స్థాయిలో విమర్శలు గుప్పించారు. రాష్ట్రంలో ఎన్నికల అనంతరం చంద్రబాబు ఓటమి భయంతో ఒత్తిడికి గురై దాడులను ప్రేరేపిస్తున్నారని మండిపడ్డారు. టిడిపి నాయకులే దాడులకు తెగబడి, కుట్ర పూరితంగా వైసిపిపై తప్పుడు ఆరోపణలు చేస్తున్నారని, దానికి తోడు పప్పు లోకేష్ తప్పుడు ఆరోపణలు చేస్తూ ట్విట్టర్లో పోస్టులు పెడుతున్నాడని పెద్దిరెడ్డి విమర్శించారు. జూన్ నాలుగో తేదీ తర్వాత ఫలితాలను చూసి టిడిపి నాయకులు ముఖాలు ఎక్కడ పెట్టుకుంటారో చూస్తామని పెద్దిరెడ్డి స్పష్టం చేశారు. గత తెలుగుదేశం ప్రభుత్వం హయాంలో మంత్రిగా పనిచేసి సీటు కూడా తెచ్చుకోలేని వ్యక్తి తమపై విమర్శలు చేయడం విడ్డూరంగా ఉందన్నారు. తమ కుటుంబం వ్యాపారాలు చేస్తూనే రాజకీయాలు సాగిస్తున్నామని, 2013 నుంచి ఆఫ్రికాలో వ్యాపారాలు చేస్తున్నామని పెద్దిరెడ్డి స్పష్టం చేశారు. ఫెర్రో మాంగనీస్, సిలికాన్ మైనింగ్ ప్రాజెక్టులు తమకు ఉన్నాయని, ఇక్కడ నుంచి వాహనాలు, మిషనరీస్ అక్కడకు పంపిస్తున్నామని స్పష్టం చేశారు. వైసిపి నాయకులు విదేశాలకు పారిపోతున్నారంటూ తప్పుడు ప్రచారాలు చేస్తున్నారని పెద్దిరెడ్డి ఆగ్రహాన్ని వ్యక్తం చేశారు. రాష్ట్ర ప్రజలంతా సీఎం జగన్ పాలనను కోరుకుంటున్నారని, మెజారిటీ స్థానాల్లో వైసిపి గెలవబోతోందని స్పష్టం చేశారు. టిడిపికి భయపడే ప్రసక్తే లేదని, తాను విద్యార్థి దశ నుంచే చంద్రబాబుతో పోటీ పడుతున్నానని స్పష్టం చేశారు. రాష్ట్రంలో సార్వత్రిక ఎన్నికల పోలింగ్ అనంతరం హింసను టిడిపి నాయకులే ప్రోత్సహించారని, అనేకచోట్ల గొడవలకు కారణమయ్యారని పెద్దిరెడ్డి ఆరోపించారు. మరోసారి సీఎం జగన్మోహన్ రెడ్డి నేతృత్వంలో వైయస్సార్ కాంగ్రెస్ పార్టీ అధికారంలోకి వస్తోందని, ప్రజలకు మరింత సంక్షేమ పథకాలను అందించబోతున్నామని స్పష్టం చేశారు. వైసిపి నాయకులపై కుట్రపూరిత ఆరోపణలకు టిడిపి ఇప్పటికైనా స్వస్తి పలకాలని ఆయన సూచించారు. టిడిపికి అనుకూలంగా వ్యవహరించే పచ్చ పత్రికలు ఇష్టం వచ్చినట్లు పిచ్చి రాతలు రాస్తున్నాయని, ఈ తరహా విధానంలో మార్పు రావాలని స్పష్టం చేశారు.