ఎక్కువ కాలం జీవించడంతోపాటు ఆరోగ్యంగా జీవితాన్ని గడపడం, ఎన్ని తరాలు మారినా, ఎన్ని శతాబ్దాలు గడిచిపోయిన ఎప్పటికప్పుడు మనుషులు కోరుకునేది ఇదే కాలం. గడుస్తున్న కొద్ది మనిషి సగటు జీవిత కాలం పెరుగుతోంది. అయితే, దానిని మరింత పెంచడానికి, ముఖ్యంగా వయసు పెరుగుతున్న కొద్ది సంభవించే శారీరిక దుర్బలత్వాన్ని అధిగమించడానికి అనేక (యాంటీ ఏజింగ్) పరిశోధనలు జరుగుతున్నాయి. ఈ దిశగా సింగపూర్ శాస్త్రవేత్తలు తాజాగా ఓ ముందంజ వేశారు. వయసు పెరుగుదలకు కారణమవుతున్న ఓ ప్రోటీన్ ను తొలిసారిగా గుర్తించారు. ఈ ప్రోటీన్ ఉత్పత్తిని అడ్డుకోవడం ద్వారా వయసు పెరుగుతున్న కొద్దీ సంభవించే శారీరక క్షీణత ప్రక్రియ వేగాన్ని తగ్గించవచ్చని తెలిపారు. తద్వారా దీర్ఘకాలం జీవించే అవకాశం ఉంటుందన్నారు. సింగపూర్ లోని డ్యూక్ - ఎన్యూఎస్ మెడికల్ స్కూల్ శాస్త్రవేత్తలు ఈ పరిశోధన నిర్వహించారు. మనుషుల్లో గుండె, మూత్రపిండాలు, కాలేయం ఊపిరితిత్తుల పని తీరులో ఇంటర్ ల్యూకిన్ (ఐఎల్11) అనే ప్రోటీన్ కీలక ప్రభావం చూపుతున్న విషయాన్ని వీరు గుర్తించారు. ఈ ప్రోటీన్ ఉత్పత్తి పెరుగుతున్న కొద్ది కాలేయంలో, పొట్టలో కొవ్వు పెరిగిపోతుందని, కండరాలు బలహీన పడుతున్నాయని వెల్లడైంది. ఇవన్నీ శారీరక దృఢత్వాన్ని తగ్గించి తద్వారా వయసు పెరుగుదల ప్రక్రియను కొనసాగించే లక్షణాలుగా పేర్కొన్నారు. 

ఎలుకలపై నిర్వహించిన పరిశోధన..

సింగపూర్ శాస్త్రవేత్తలు తమ పరిశోధన కొనసాగిస్తూ ఎలుకలపై ప్రయోగాలు నిర్వహించారు. వాటి నుంచి ఐఎల్ 11 ప్రోటీన్ తొలగించడం, ఐఎల్ 11 నిరోధక చికిత్స నిర్వహించడం వంటివి జరిపారు. దీని ద్వారా ఎలుకల్లో వయసు పెరుగుతున్న కొద్ది సంభవించే వ్యాధుల బలహీనత మొదలైన వాటి నుంచి రక్షణ లభించింది. వాటి సగటు జీవితకాలం 24.9% పెరిగింది. 75 వారాల వయసులో ఉన్న ఎలుకల్లో ఇది మనుషుల్లో దాదాపు 55 ఏళ్ల వయసుతో సమానం. ఐఎల్-11 నిరోధక చికిత్సను ప్రారంభించి అవి మరణించే వరకు కొనసాగిస్తే మగ ఎలుకల సగటు జీవిత కాలం 22.5 శాతం, ఆడ ఎలుకల సగటు జీవితకాలం 25 శాతం పెరిగింది. అంతేకాదు ఆరోగ్య సమస్యలు తీసుకొచ్చే తెల్ల కొవ్వు బదులు క్యాలరీలను ఖర్చు చేసే బ్రౌన్ ఫ్యాట్ ఉత్పత్తి ఎలుకల్లో మొదలైంది. గుండె సంబంధిత సమస్యల నుంచి కూడా వాటికి రక్షణ లభించింది. ఈ ఫలితాలపై డ్యూక్ - ఎన్యూఎస్ డీన్ ప్రొఫెసర్ థామస్ కాప్మన్ మాట్లాడుతూ ఐఎల్ 11 ప్రోటీన్ గురించి తాజాగా వెల్లడైన అంశాలు.. వృద్ధులు మరింత ఎక్కువ కాలం ఆరోగ్యంగా జీవించడానికి దోహదపడతాయన్నారు. కండరాల పటుత్వం, శారీరక దృఢత్వం పెరగటం ద్వారా వృద్ధులు జారి పడిపోయే ప్రమాదం కూడా గణనీయంగా తగ్గుతుందన్నారు. ప్రపంచ వ్యాప్తంగా ప్రజలు ఆరోగ్యవంతమైన దీర్ఘకాలిక జీవితాలు గడిపేలా ఐఎల్ 11 చికిత్సను అందరికీ అందుబాటులోకి తీసుకురావాలన్నది తమ లక్ష్యంగా వారు పేర్కొన్నారు. ఈ పరిశోధనకు సంబంధించిన వివరాలు తాజాగా సైన్స్ జర్నల్ నేచర్లో ప్రచురితమయ్యాయి. వయసు పెరుగుదల ప్రక్రియను నెమ్మదింపజేసే పరిశోధనలు ప్రపంచవ్యాప్తంగా జరుగుతున్నాయి. మనుషుల జీవిత కాలాన్ని ఒక ఏడాది కాలంపాటు పొడిగిస్తే అది 38 ట్రిలియన్ డాలర్ల సంపదన సృష్టిస్తుందని అంచనాలు ఉన్నాయి.