శివ లింగం అంటే ఏంటి? అన్న సందేహం సాధారణ ప్రజలకు ఇప్పటికీ ప్రశ్నే. సనాతన కాలం నుంచి వస్తున్నదే అన్న విషయం తప్ప ఇంకేం తెలియదు. పురాణాలు, ఆధ్యాత్మిక పండితులు తెలిపిన వివరాల ప్రకారం.. ఆకాశమే లింగం. భూమి దాని పీఠం. అది సమస్త దేవతలకు నిలయం. ఇందులోనే అంతా లయం చెందుతుంది. అందుకే దీనిని లింగం అని పిలిచారు. ‘లిం’ అంటే మన కంటికి కనిపించకుండా లీనమై ఉన్నదానిని, ‘గం’ అంటే ఒక గుర్తు రూపంలో తెలియజేస్తుంటుంది. అందుకే అది లింగం అయ్యింది. ఈ సృష్టి సమస్తం శివమయం. ఈ సమస్తాన్ని ఆయనే సృష్టించాడు. సృష్టికి పూర్వం ఈ సమస్త విశ్వమంతా నీటితో నిండి మహాసముద్రం వలె ఉండేది. ఆ మహాజలం నుంచి ఓ మహా తేజస్సు ఉత్పన్నమైంది. ఆ తేజోపుంజమే క్రమంగా ఒక రూపాన్ని సంతరించుకుంది. ఆ తేజోమయరూపమే పరబ్రహ్మం. ఆయనే లింగరూపాన్ని ధరించిన శివుడు. సామాన్యంగా లింగ శబ్ధానికి చిహ్నం లేక లక్షణం అనే అర్థాలు ఉన్నాయి. ప్రకృతి, వికృతులు రెండూ లింగమనే సౌంఖ్య దర్శనం చెప్పింది. విగ్రహాన్ని మూర్తి అని అంటారు. మూర్తి ధ్యానాన్ని బట్టి ఆకారాలు ఉంటాయి. కానీ, లింగములో ఆకారం గానీ, రూపం గానీ ఉండదు. అదొక చిహ్నం మిత్రమే. లయనా ల్లింగముచ్యతే అని అన్నారు. అంటే, లయం ప్రళయం కావటం వల్ల లింగంగా చెప్పబడుతోంది. ప్రళయాగ్నిలో సర్వమూ భస్మమై శివలింగంలో చేరుతుంది. లింగార్చనతో సర్వదేవతల పూజ జరుగుతుందని లింగపురాణం చెబుతోంది. స్వామి సర్వవ్యాపి కనుక ఆయనకు ఆకారం ఉండదు. తాను ఇతరులకు దర్శనం ఇవ్వాలనుకుంటే అంబతో కలిసి (సాంబ) దర్శనం ఇస్తాడు. ఆ స్వామి రూపం లేని స్థితి నుంచి సాంబమూర్తిగా దర్శనమివ్వడానికి మధ్యలో మరొక రూపం ఉంది. దానినే అరూపమని అంటారు. అదే శివలింగం.