ఇంటి యజమాని గోచీ పోసి పంచె కట్టుకోవాలి. ఉత్తరీయం ధరించాలి. సాధారణంగా నిత్య పూజ ప్రతి ఇంట్లో స్త్రీనే చేస్తుంది. కానీ నిత్య పూజ అనేది పురుషుడు చేయాలి. అంటే యజమాని నిత్యపూజ చేయాలి. సంకల్పంలోనే ఉంది ‘ధర్మపత్నీ సమేతస్య’ అని ఉంది. ‘పతీసమేతస్య’ అని ఎక్కడా లేదు. అంటే దాని అర్థం ఇంట్లో పూజ ఇంటి యజమాని చేయాలి. ఇల్లు అబివృద్ధిలోకి రావాలి అని యజమాని కోరుకోవాలి. యజమానిగా ఉన్నవాడు అది కూడా అడగడం బరువైపోతే ఎలా?  అందువల్ల పురుషుడు ఒళ్లు వంచి ప్రతి రోజు పూజ చేయాలి. అదేవిధంగా నైమిక్తిక తిథులలో గానీ,  వ్రతం అప్పుడు గానీ పూజ చేసేటప్పుడు ధర్మపత్ని, పిల్లలు కూడా పక్కన ఉండాలి. ఇక వస్త్రధారణ విషయనికి వస్తే ప్రధానంగా ఆడపిల్ల అయితే లంగావోణీ, వివాహిత అయితే చీర కట్టుకోవాలి. అమ్మవారికి అవే కదా ప్రధానం.

పురుషుల విషయనికి వస్తే.. పురుషులకు సంబంధించి వేదం ఒక మాట చెప్పింది. ‘వికచ్ఛః అనుత్తరీయశ్చ, నగ్నశ్ఛావస్త్ర ఏవచ’ అనగా వికచ్ఛః అంటే గోచీ పెట్టుకోలేదు.. అనుత్తరీయశ్చ అంటే పైన ఉత్తరీయం లేదు అని. గోచీ పోయకుండా కేవలం బట్టను చుట్టు మాత్రమే తిప్పి కట్టడం దిగంబరం అవుతుంది. కాబట్టి పురుషుడికి ఉత్తరీయం ఉండాలి. అలాగే గోచీ పోసి పంచె కట్టుకోవాలి. వెనక్కి తీసి కుచ్చిళ్లు పోసి గోచీ వెనక్కి దోపుకోవాలి. దానిని కచ్ఛం అంటారు. అందుకే వేదం చదువుకున్న పెద్దలు.. భోజనం చేస్తుంటే కనీసం అంగవస్త్రం అంటారు. చిన్న గుడ్డ అయినా సరే గోచీ పోసుకుని కూర్చుని భోజనం చేయాలి. వికచ్ఛంగా భోజనం చేయకూడదు. వికచ్ఛంగా పూజ దగ్గరికి వెళ్ళరు.

కాబట్టి పురుషులు ఈ రెండు పద్ధతులను కచ్చితంగా పాటించాలి. ఉత్తరీయం ఎటువైపు వేసుకోవాలి. ఎడమ భుజం మీద ఉత్తరీయం ఉంటే అతడు భార్యా సహితుడు, మంగళప్రదుడు అని గుర్తు.  కుడి భుజం మీద ఉత్తరీయం వేసుకుంటే భార్య చనిపోయింది, అమంగళకరుడు, యజ్ఞయాగాది క్రతువులకు పనికిరాడు అని గుర్తు. అసలు ఉత్తరీయం వేసుకోకపోతే పూజకు అర్హుడు కాదు అని గుర్తు. కాబట్టి చొక్కా కానీ, బనియన్‌ కానీ ఉండకూడదు.

- బండపెల్లి రామ్‌ మనోహర్‌ శర్మ, ఆధ్యాత్మిక పండితుడు