అన్నాచెల్లెలి, అక్కాతమ్ముల అనుబంధానికి రాఖీ పండుగ ప్రతీక. అన్నాదమ్ములు దీర్ఘాయువుతో జీవించాలని కోరుకుంటూ తోబుట్టువులు రాఖీ కడతారు. ప్రతి శ్రావణ మాసంలోని శుక్లపక్ష పౌర్ణమి రోజునే రాఖీ పౌర్ణమిగా చెప్తాం. ఈ ఏడాది ఆగస్టు 19 (సోమవారం)న రాఖీ పండుగ వచ్చింది. వాస్తవానికి సమయాలు చూడకుండానే చాలా మంది సోదరీమణులు.. తమ అన్నాదమ్ములకు రాఖీలు కడతారు. అయితే, ఈ ఏడాది మాత్రం ముహూర్తం చూసుకొనే రాఖీ కట్టాలని జ్యోతిష్య నిపుణులు స్పష్టం చేస్తున్నారు. ఎందుకంటే.. ఈ ఏడాది రాఖీ పండుగ సందర్భంగా భద్ర కాలం దాపురిస్తున్నది. ఈ భద్ర కాలంలో రాఖీ కడితే అన్నాదమ్ములకు చెడు జరుగుతుందని నిపుణుల వాదన. ఉదయం 5:53 గంటలకు ప్రారంభమయ్యే భద్రకాలం.. మధ్యాహ్నం 1:32 గంటల వరకు కొనసాగుతుంది. ఈ సమయంలో రాఖీ కట్టకూడదని చెప్తున్నారు. ఈ భద్రకాలం ముగిసిన తర్వాత మధ్యాహ్నం 1: 43 గంటల నుంచి రాత్రి వరకు రాఖీ కట్టేందుకు శుభ ముహూర్తం అని జ్యోతిష్య పండితులు స్పష్టం చేస్తున్నారు.

ఎవరీ భద్ర.. ఎందుకు ఆ సమయంలో రాఖీ కట్టకూడదంటే..

శనిదేవుని సోదరి భద్ర అని పురాణాలు చెప్తున్నాయి. భద్ర సమయం వచ్చినప్పుడు ఏ శుభ కార్యం చేసినా అశుభం కలుగుతుందని బ్రహ్మదేవుడి నుంచి శాపం ఉంది. అందుకే రాఖీ పౌర్ణమి రోజున భద్ర కాలంలో రాఖీ కట్టకూడదట. ఈ భద్ర కాలంలోనే రావణాసురుడికి అతడి సోదరి రాఖీ కట్టడంతో అదే సంవత్సరంలో రాముడి చేతిలో లంకాధిపతి హతమయ్యాడు. అందుకే ఆ సమయంలో రాఖీ కట్టవద్దట.