హిందూ సంప్రదాయం ప్రకారం ఏదైనా శుభకార్యాల్లో, పూజా కార్యక్రమాల్లో కొబ్బరికాయకు ఎంతో  ప్రాధాన్యం ఇస్తారు. పూజ అనంతరం భగవంతునికి కొబ్బరికాయ సమర్పించడం అనవాయితీగా వస్తుంది. అయితే కొబ్బరికాయను పిలకతో కొట్టడం ద్వారా కొబ్బరికాయకు ప్రాధాన్యం ఉంటుంది. అందుకే కేవలం పిలక ఉన్న కొబ్బరికాయను కొట్టడం మనం చూస్తుంటాం. జుట్టు లేకుండా కొబ్బరికాయను కొట్టవద్దని చాలా మంది చెబుతుంటారు. అసలు  జుట్టులేని కొబ్బరికాయ కొట్టకూడదని చెబుతారు ఎందుకు?దీని వెనుక ప్రత్యేకమైన కారణం ఏమైనా ఉన్నదా? పిలకలేని కొబ్బరికాయ కొడితే దోషమా..? అంటే..

శ్రవణం కీర్తనం విష్ణోః స్మరణం పాదసేవనం।

అర్చనం వందనం దాస్యం సఖ్యమాత్మ నివేదనం॥

అనేవి తొమ్మిది విధాలైన భక్తి మార్గాలు. దీంట్లో చివరిది ఆత్మ నివేదనం. అంటే భగవంతునికి భక్తుడు తనను తాను సమర్పించుకోవడం. పూజ చేసిన తర్వాత కొబ్బరికాయను మన ఆత్మ స్వరూపంగా భావించి, దైవానికి నైవేద్యంగా సమర్పించాలి. కొబ్బరికాయ మానవ శరీరానికి ప్రతీక. కాయ పైనుండే పొర.. చర్మం. పీచు మాంసం, దృఢంగా ఉండే చిప్ప ఎముకలు, అందులో ఉండే కొబ్బరి మనిషిలోని ధాతువు. కాయలోని నీళ్లు ప్రాణాధారం.పైన ఉండే మూడు కన్నులే.. ఇడ, పింగళ, సుషుమ్న నాడులు. జుట్టు అఖండమైన జ్ఞానానికీ, అహంకారానికీ ప్రతీక. అందుకే మన శరీరాన్ని ఆత్మతో నివేదించుకుంటున్న భక్తి భావంతో కొబ్బరికాయను కొట్టి భగవంతునికి సమర్పించు కోవాలి. ఇందులోని పరమార్థమిదే. అందుకే పిలక లేని కొబ్బరికాయను దేవునికి కొట్టడం దోషమే అవుతుంది.

పురాణాల ప్రకారం పరమేశ్వరుడు త్రిపురాసుర అనే రక్షసుడిని చంపడానికి వెళ్లినప్పుడు పరమశివుడు గణపతిని పూజించి, అతని కోరిక మేరకు తన తేజస్సుకు ప్రతిరూపంగా మూడు కండ్లు, జుట్టుతో తన శిరస్సులా ఉన్న కొబ్బరికాయను సృష్టించి నివేదనగా వినాయకుడికి సమర్పించాడని పురాణాలు చెబుతున్నాయి. అందుకోసమే దేవునికి కొబ్బరికాయ కొట్టినప్పుడు తప్పనిసరిగా పిలక ఉన్న కొబ్బరికాయలే కొట్టాలి. అప్పుడే పూజ సంపూర్ణం అవుతుందని భావన.