దొంగలకు శిక్షణ ఇచ్చింది కానిస్టేబులే!

బెంగళూరు: బెంగళూరులో సంచలనం సృష్టించిన ఏటీఎం వ్యాన్ దోపిడీ కేసును పోలీసులు ఛేదించారు. ఈ కేసులో ఓ పోలీస్ కానిస్టేబులే సూత్రధారిగా వ్యవహరించి, దొంగల ముఠాకు శిక్షణ ఇవ్వడం విస్మయానికి గురిచేస్తోంది. నవంబర్ 19న డెయిరీ సర్కిల్ ఫ్లైఓవర్‌పై జరిగిన ఈ దోపిడీలో రూ.7.11 కోట్లు అపహరణకు గురవగా, ఇప్పటివరకు ఆరుగురు నిందితులను అరెస్ట్ చేసి, వారి నుంచి రూ.6.29 కోట్లను స్వాధీనం చేసుకున్నారు. సీఎంఎస్ క్యాష్ మేనేజ్‌మెంట్ సర్వీసెస్ కు చెందిన నగదు వ్యాన్‌ను లక్ష్యంగా చేసుకుని ఈ దోపిడీ జరిగింది. ఫ్లైఓవర్‌పై వ్యాన్‌ను అడ్డగించిన 6 నుంచి 8 మంది సభ్యుల ముఠా, తాము 'ఆర్‌బీఐ అధికారులుగా' పరిచయం చేసుకుంది. డ్రైవర్‌ను నమ్మించి, వ్యాన్‌లోని నగదును కొల్లగొట్టింది. ఈ కుట్రలో ముగ్గురు కీలక సూత్రధారులు కాగా, మిగిలిన వారు వారికి సహకరించారు. దోపిడీ అనంతరం ముఠా నగరం విడిచి పరారైంది. ఈ దోపిడీకి గోవిందపుర పోలీస్ స్టేషన్‌కు చెందిన కానిస్టేబుల్ అన్నప్ప నాయక్ మాస్టర్‌మైండ్‌గా వ్యవహరించాడు. మూడు నెలల పాటు పక్కా ప్రణాళికతో, దొంగల ముఠాకు ప్రత్యేక శిక్షణ ఇచ్చాడు. సీసీటీవీ కవరేజ్ లేని ప్రాంతాలను గుర్తించడం, దోపిడీ అనంతరం ఆధారాలు వదలకుండా ఎలా తప్పించుకోవాలనే దానిపై 15 రోజుల పాటు శిక్షణ ఇచ్చినట్లు విచారణలో తేలింది.  ఈ కుట్రలో కంపెనీ ఉద్యోగుల ప్రమేయం కూడా బయటపడింది. సీఎంఎస్ కంపెనీ ట్రాన్స్‌పోర్ట్ ఇన్‌చార్జ్ గోపాల్ ప్రసాద్, క్యాష్ వ్యాన్ వెళ్లే మార్గం, సమయం వంటి రియల్‌టైమ్ సమాచారాన్ని ముఠాకు అందించాడు. కంపెనీ మాజీ ఉద్యోగి ఎక్సావియర్, దోచుకున్న డబ్బును నగరం దాటించడంలో కీలక పాత్ర పోషించాడు. కేసును సవాలుగా తీసుకున్న బెంగళూరు సెంట్రల్ క్రైమ్ బ్రాంచ్ (సీసీబీ), సౌత్ డివిజన్ పోలీసులు సంయుక్తంగా దర్యాప్తు చేపట్టారు. కేరళ, తమిళనాడు, గోవా, ఆంధ్రప్రదేశ్, తెలంగాణ సహా ఆరు రాష్ట్రాల్లో 200 మంది పోలీసులు ఏకకాలంలో గాలింపు చర్యలు చేపట్టారు. సీసీటీవీ ఫుటేజ్, ఫోన్ డేటా, మానవ ఇంటెలిజెన్స్ సహాయంతో కేవలం 72 గంటల్లోనే ప్రధాన కుట్రదారులైన అన్నప్ప నాయక్, గోపాల్ ప్రసాద్, ఎక్సావియర్‌లను బెంగళూరులో అరెస్ట్ చేశారు. వీరి నుంచి రూ.5.76 కోట్లు స్వాధీనం చేసుకున్నారు.  అనంతరం హైదరాబాద్‌లోని ఓ లాడ్జ్‌లో నవీన్, నెల్సన్‌లను పట్టుకుని, వారి వద్ద నుంచి రూ.53 లక్షలు స్వాధీనం చేసుకున్నారు. దోపిడీకి ఉపయోగించిన ఎస్‌యూవీ వాహనాన్ని ఆంధ్రప్రదేశ్‌లోని చిత్తూరు జిల్లాలో పగిలిపోయిన క్యాష్ చెస్టులతో గుర్తించారు. పరారీలో ఉన్న రవి సహా మరో ఇద్దరి కోసం గాలిస్తున్నారు. ఈ ఘటనపై స్పందించిన బెంగళూరు పోలీస్ కమిషనర్ సీమాంత్ కుమార్ సింగ్, సీఎంఎస్ కంపెనీ ఆర్‌బీఐ మార్గదర్శకాలను ఉల్లంఘించిందని, వారి నిర్లక్ష్యం వల్లే ఈ దోపిడీ జరిగిందని ఆరోపించారు. కంపెనీ లైసెన్సును రద్దు చేయాలని సిఫార్సు చేస్తామని ఆయన హెచ్చరించారు. ఇంకా మిగిలిన రూ.82 లక్షల కోసం గాలింపు కొనసాగుతోందని పోలీసులు తెలిపారు.