ఈవార్తలు, సినిమా న్యూస్: తెలంగాణ ఫోక్ సాంగ్స్ అంటేనే ఓ ఊపు.. అందులోనూ అమ్మాయి, అబ్బాయి లవ్ స్టోరీ లాంటి కథకు వీక్షకులు బ్రహ్మరథం పడతారు. అలా ప్రేక్షకుల మన్ననలు పొందిన ఫోక్ సాంగ్‌లో ‘‘ఓ పిలగా వెంకటేషు’’ సాంగ్ సంచలనం సృష్టించింది. యూట్యూబ్‌లో చేరి సరిగ్గా నేటితో 9 నెలలు పూర్తి చేసుకున్న ఈ పాట.. 25 కోట్ల వ్యూస్‌కు చేరువలో ఉంది. గొప్ప గొప్ప సాంగ్స్ కూడా వేవ్ తగ్గగానే చతికిలపడతాయి. కానీ.. ఓ పిలగా వెంకటి సాంగ్ మాత్రం ఇప్పటికీ యూట్యూబ్‌లో కొత్త రికార్డులు క్రియేట్ చేస్తోంది. ప్రస్తుతం ఇండియాలోనే టాప్ మ్యూజిక్ వీడియోల్లో 43వ స్థానంలో నిలిచింది. భవ్య ట్యూన్స్ నిర్మాణంలో వచ్చిన ఈ సాంగ్‌లో పూజా నాగేశ్వర్ డ్యాన్స్, అందంతో మెప్పించింది. ఆమెకు జంటగా రౌడీ హరీశ్ కూడా డ్యాన్స్‌తో ఇరగదీశాడు. వెంకట్ అజ్మీరా సంగీత దర్శకుడిగా, ప్రభ లిరిక్స్ అండ్ సింగర్‌గా వచ్చిన ఈ సాంగ్‌కు శేఖర్ వైరస్ కొరియోగ్రఫీ అందించారు.

ఈ పాట యూట్యూబ్‌లో విడుదలై 9 నెలలు కావొస్తున్న సందర్భంగా ప్రొడ్యూసర్ బాలు పాలోజీ మాట్లాడుతూ.. త్వరలోనే వీక్షకులకు డీజే ఫీస్ట్ అందించబోతున్నామని వెల్లడించారు. ఓ పిలగా వెంకటి సాంగ్‌ను డీజే వెర్షన్‌లో సరికొత్తగా, ఊపు వచ్చేలా తీసుకొస్తున్నామని తెలిపారు. ఆ డీజే సాంగ్‌లో ఆట సందీప్, జ్యోతిరాజ్ కాంబోలో వస్తోందని చెప్పారు. ఆ డీజే సాంగ్‌కు నమ్రిత్ కొరియోగ్రఫీ అందించబోతున్నారు. ఇక, ఓ పిలగా వెంకటి సాంగ్‌ను ఆదరించినందుకు ప్రేక్షకులకు ధన్యవాదాలు తెలిపారు. పల్లెల్లో చిన్న పిల్లల దగ్గరి నుంచి పండు ముసలివాళ్ల వరకు అంతా.. ఈ సాంగ్ విని కాళ్లు కదిపారని.. అదే తాము సాధించిన గొప్ప విజయం అని సంతోషం వ్యక్తం చేశారు. నార్త్ ఇండియాలోనూ ఓ పిలగా వెంకటి సాంగ్ దుమ్ములేపిందని వివరించారు. తమిళ్ వెర్షన్‌లో విడుదల చేసిన సాంగ్‌కు కూడా ఆదరణ లభించిందని, అందుకు తమిళ ప్రేక్షకులకు కృతజ్ఞతలు తెలియజేస్తున్నానని అన్నారు. రాబోయే రోజుల్లో మరిన్ని గొప్ప ఫోక్ సాంగ్స్ అందించేందుకు బూస్ట్ ఇచ్చారని పేర్కొన్నారు.