కొన్ని సినిమాలను నడిపించడానికి కథతో అస్సలు పనిలేదు. బ్రాండ్‌తోనే పని. పుష్ప 2 విషయంలోనూ ఇదే జరిగింది .పుష్ప రాజ్ కారెక్టర్‌ను గంజాయిలా ఆడియన్స్‌కు ఎక్కించేసాడు సుకుమార్. గాంజా కొట్టడం తప్పే కానీ కిక్ ఇస్తుంది కదా.. అలాగే పుష్ప కారెక్టర్ కూడా. పుష్ప వేసే ప్రతీ అడుగు చేసే ప్రతీ పనీ తప్పే. కానీ చూసే ఆడియన్‌కు అది రైటే. అలా ఉంది సుకుమార్ రైటింగ్. ఈ సినిమాలో ప్రతీ 10-15 నిమిషాలకు ఓసారి హై ఇచ్చేలా స్క్రీన్ ప్లే రాసుకున్నాడు లెక్కల మాస్టారు. కథ నెమ్మదిస్తున్న ప్రతీసారి అల్లు అర్జున్ డ్యూటీ ఎక్కేసాడు. కేవలం హై మూవెంట్స్ ఇవ్వడంపైనే ఫోకస్ చేసాడు సుక్కు. ఎమోషన్స్ కూడా బాగానే వర్కవుట్ చేసాడు.

యాక్షన్ సీక్వెన్సులు అయితే నెక్ట్స్ లెవల్. జాతర సీక్వెన్స్, క్లైమాక్స్ ఫైట్ పూనకాలు పుట్టించాడు. ఫస్టాఫ్ అంతా బన్నీ, ఫహాద్ మధ్య టామ్ అండ్ జెర్రీ గేమ్ నడుస్తుంది. సెకండాఫ్ ఎక్కువగా హై ఎమోషన్స్‌పై ఫోకస్ చేసాడు సుకుమార్. జాతరలో వచ్చే రష్మిక మందన్న ఎపిసోడ్‌లో సుక్కు రైటింగ్ చాలా బాగుంది. ఒక్కటైతే నిజం.. పుష్పలో ఉన్నంత కథ ఇందులో లేదు. హై ఇవ్వడమే పనిగా సీన్స్ రాసుకుంటూ వెళ్లిపోయాడు. నాకు అనిపించిన మరో మేజర్ మైనస్.. సినిమాలో అల్లు అర్జున్ క్యారెక్టర్ తప్ప అందరూ డమ్మీనే. బన్నీ కోసం మిగిలిన క్యారెక్టర్స్‌ను తక్కువ చేసారేమో అనిపించింది.

ఎన్నో అంచనాలు పెట్టుకున్న ఫహాద్ ఫాజిల్ పాత్రను చాలా నీరసంగా ముగించారు. క్లైమాక్స్ కూడా అసంపూర్తిగానే ముగించారు. మూడో పార్ట్‌కు లీడ్ ఇచ్చినా ఫస్ట్ పార్ట్ అంత కిక్ ఇవ్వలేదు. అల్లు అర్జున్ ప్రాణం పెట్టేసాడు. ఈ సినిమా లేకపోతే కెరీర్ లేదేమో అన్నట్లే నటించాడు. రష్మిక మందన్న కూడా చాలా బాగా నటించింది. జగదీష్ నటన బాగుంది. సుకుమార్ రైటింగ్ అదిరిపోయింది. ప్రతీ సీన్‌లో ఆయన కష్టం కనిపించింది. దేవీ శ్రీ ప్రసాద్ బ్యాగ్రౌండ్ స్కోర్ కూడా అదిరిపోయింది. 

ఓవరాల్‌గా పుష్ప 2.. బ్రాండ్‌తో బయటపడిపోయే సినిమా

సమీక్షకుడు: ప్రవీణ్ కుమార్, సీనియర్ ఫిల్మ్ జర్నలిస్టు