డిగ్రీ పూర్తి చేసిన నిరుద్యోగులకు శుభవార్త. నేషనల్ ఇన్సూరెన్స్ కంపెనీ లిమిటెడ్ (NICL) తాజాగా భారీ నోటిఫికేషన్ విడుదల చేసింది. ఈ నోటిఫికేషన్ ద్వారా 500 అసిస్టెంట్ పోస్టులను భర్తీ చేయబోతోంది. దేశంలో ఉన్న నేషనల్ ఇన్సూరెన్స్ కంపెనీ కార్యాలయాల్లో క్లాస్-3 క్యాడర్ లో ఖాళీగా ఉన్న అసిస్టెంట్ పోస్టులు భర్తీకి దరఖాస్తులను కోరుతూ ఈ జాబ్ నోటిఫికేషన్ విడుదలైంది. ఈ పోస్టులకు ప్రభుత్వ గుర్తింపు పొందిన యూనివర్సిటీ నుంచి గ్రాడ్యుయేషన్ ఉత్తీర్ణత సాధించిన అభ్యర్థులను అర్హులుగా పేర్కొంది. దేశవ్యాప్తంగా ఉన్న మొత్తం 500 పోస్టుల్లో ఏపీలో 21 పోస్టులు, తెలంగాణలో 12 పోస్టులు ఖాళీగా ఉన్నాయి. విద్యార్హతతో పాటు అభ్యర్థి దరఖాస్తు చేసే రాష్ట్రానికి సంబంధించి ప్రాంతీయ భాష చదవడం, రాయడం, మాట్లాడడం వచ్చి ఉండాలని నోటిఫికేషన్ లో పేర్కొన్నారు.

అక్టోబర్ ఒకటో తేదీ నాటికి 21 ఏళ్ల నుంచి 30 ఏళ్ల మధ్య వయసు ఉన్న అభ్యర్థులు మాత్రమే ఈ పోస్టులకు అర్హులు. ఎస్సీ, ఎస్టీలకు ఐదేళ్లు, ఓబీసీలకు మూడేళ్లు, దివ్యాంగులకు 10 ఏళ్ల వయసు సడలింపును ఇచ్చారు. ఈ పోస్టులకు అక్టోబర్ 24 వ తేదీ నుంచి ఆన్లైన్లో దరఖాస్తులు చేసుకోవచ్చు. దరఖాస్తు చేసుకునేందుకు ఆఖరి తేదీగా నవంబర్ 11గా పేర్కొన్నారు. అప్లై చేసిన అభ్యర్థులకు ఆన్లైన్ ప్రిలిమినరీ, ఆ తరువాత మెయిన్ ఎగ్జామినేషన్, అనంతరం రీజనల్ లాంగ్వేజ్ టెస్ట్, డాక్యుమెంట్ వెరిఫికేషన్, మెడికల్ ఎగ్జామినేషన్ నిర్వహించి తుది ఎంపిక చేయనున్నారు. ఎంపికైన అభ్యర్థులకు నెలకు రూ.22,405 నుంచి రూ.62,265 ఉంటుందని నోటిఫికేషన్లో పేర్కొంది. అర్హులైన ఆసక్తి కలిగిన అభ్యర్థులు ఈ నోటిఫికేషన్ ను సద్వినియోగం చేసుకోవాలని ఆ ప్రకటనలో పేర్కొన్నారు. పూర్తి వివరాలకు కంపెనీ అధికారిక వెబ్సైట్ http://nationalinsurance.nic.co.in చూడవచ్చు.