కర్ణాటక క్రికెట్ సంఘం అధ్యక్షుడిగా పోటీ చేస్తున్న భారత మాజీ పేసర్ వెంకటేశ్ ప్రసాద్ కు షాక్ తగిలింది. ఏకగ్రీవంగా అతడు కేఎస్‌సీఏ బాస్‌గా ఎన్నికవ్వడం ఖాయం అనుకున్నవేళ హైకోర్టు కీలక నిర్ణయం తీసుకుంది. రెండు రోజుల క్రితం ఎన్నికల అధికారి తిరస్కరించిన కే.ఎన్ శాంత్ కుమార్ నామినేషన్‌ను పునరుద్ధరించింది. దాంతో.. కర్ణాటక క్రికెట్ సంఘానికి డిసెంబర్ 7న జరుగబోయే అధ్యక్ష ఎన్నికల్లో ప్రసాద్, శాంత్ కుమార్ పోటీ పడనున్నారు. షెడ్యూల్ ప్రకారం ప్రకారం నవంబర్ 30న కర్ణాటక క్రికెట్ సంఘానికి ఎన్నికలు జరగాలి. కానీ, ఎన్నికల నిర్వహణాధికారి డాక్టర్.బి. బసవరాజు (మాజీ ఐఏఎస్) క్రికెట్ సంఘం నిర్వహణ కమిటీ నుంచి స్పష్టత లేదని.. వెంటనే కోర్టు జోక్యం చేసుకోవాలని పట్టుపట్టారు. ఇరువురి వాదనలు విన్న జస్టిస్ సూరజ్ గోవిందరాజు ఎలక్షన్స్‌ను డిసెంబర్ 7న నిర్వహించాలని చెప్పారు. అధ్యక్ష పదవి కోసం గేమ్ ఛేంజర్స్ టీమ్ నుంచి వెంకటేశ్‌ ప్రసాద్‌, టీమ్ బ్రిజేశ్ నుంచి కే.ఎన్. శాంత్ కుమార్, కల్పన వెంకటాచార్ నామినేషన్ వేశారు. కానీ, సాంకేతిక కారణాలతో శాంత్ దరఖాస్తును ఎన్నికల అధికారి తిరస్కరించారు. అయితే.. అతడు ఎన్నికల అధికారి నిర్ణయాన్ని హై కోర్టులో సవాల్ చేశాడు. ఫలితంగా ఈ వ్యవహారంలో మరోసారి జోక్యం చేసుకున్న కోర్టు.. శాంత్ కుమార్ నామినేషన్‌ సాంకేతికంగా ఆమోదయోగ్యమేనని తెలిపింది. ప్రింటర్స్ ప్రైవేట్ కంపెనీ డైరెక్టర్ అయిన శాంత్ కుమార్ కర్ణాటక క్రికెట్ సంఘానికి రూ.200 బాకీ ఉన్నాడని.. సాంకేతికంగా అతడి దరఖాస్తు చెల్లదని ఎన్నికల అధికారి, రిటైర్డ్ ఐఏఎస్ బసవరాజు స్పష్టం చేశారు. అయితే.. హై కోర్టు మాత్రం ఆ కారణం సహేతుకం కాదని పేర్కొంటూ శాంత్ కుమార్ పోటీలో ఉంటాడని తేల్చి చెప్పింది