విద్యత్తు అవసరాలకు భారీ ప్రణాళికలు

దేశంతో పోటీపడేలా బలమైన పునాదులు

పీపీటీ ప్రజంటేషన్‌లో డిప్యూటీ సీఎం భట్టి

హైదరాబాద్, నవంబర్ 29 (ఈవార్తలు): భవిష్యత్తులో రాష్ట్ర జీఎస్డీపీని పెంచేందుకు అవ‌స‌ర‌మైన చ‌ర్య‌ల‌ను సీఎం రేవంత్ రెడ్డి నాయ‌క‌త్వంలోని కేబినెట్, ప్ర‌జాప్ర‌భుత్వం చ‌ర్య‌లు తీసుకుంటోందని ఉప ముఖ్య‌మంత్రి భ‌ట్టి విక్ర‌మార్క మీడియా స‌మావేశంలో వెల్ల‌డించారు. తెలంగాణ ప్ర‌జ‌ల విద్యుత్ అవ‌స‌రాల‌ను తీర్చేందుకు పెద్ద ఎత్తున ప్రణాళిక‌లు సిద్ధం చేసిందని ఆయ‌న చెప్పారు. ప్ర‌పంచంలోనే అత్యంత అభివృద్ధి చేసిన దేశాల‌తో పోటీప‌డేలా తెలంగాణ రాష్ట్రాన్ని నిర్మించేందుకు బ‌ల‌మైన పునాదులు వేస్తున్నట్లు చెప్పారు. అందులో భాగంగా 2047 నాటికీ 3 ట్రిలియన్ డాల‌ర్ల ఆర్థిక వ్యవస్థగా తెలంగాణ రాష్ట్రాన్ని నిర్మించే ల‌క్ష్యంతో ముందుకు వెళుతున్న ద‌శ‌లో అందుకు అనుగుణంగా విద్యుత్తు ప్రణాళికలను తయారు చేశామన్నారు. ఉత్పత్తి రంగాలు పెద్ద ఎత్తున అభివృద్ధి చెందితేనే వాటి ద్వారా ఉత్పత్తి భారీ స్థాయిలో పెరిగి రాష్ట్ర జిఎస్డిపి కి ఉపయోగపడతాయి. తద్వారా మన ఎకానమీ ఆశించిన స్థాయిలో పెరుగుతుంద‌ని ఆయ‌న అన్నారు.  ఉత్పత్తి రంగాలైన త‌యారీ, వ్య‌వ‌సాయ‌, సేవ‌ల రంగాలకు అవ‌స‌ర‌మైన నాణ్య‌మైన విద్యుత్ ను అందించడ‌మే ప్రధానాశంగా ముందుకు వెళుతున్నట్లు చెప్పారు. ప్రపంచ స్థాయి నగరాలతో పోటీపడే విధంగా తెలంగాణ అభివృద్ధి చెందాలని ఆశిస్తున్నాం. ప్రపంచంలోని వివిధ దేశాలలో తలసరి విద్యుత్ వినియోగానికి అనుగుణంగా తెలంగాణలో కూడా తలసరి విద్యుత్ వినియోగం పెంచడానికి ఆలోచన చేస్తూ ముందుకు వెళుతున్నట్లు చెప్పారు. రాష్ట్రంలో ప్ర‌జాప్ర‌భుత్వం అధికారంలోకి వచ్చాక గతంలో కంటే ఒకేసారి 10 శాతం విద్యుత్ డిమాండ్ పెరిగిందని భ‌ట్ఠి విక్ర‌మార్క వివ‌రించారు. సీఎం రేవంత్ రెడ్డి, పరిశ్రమల శాఖ మంత్రి శ్రీధర్ బాబులు దావోస్ వెళ్లి వివిధ సంస్థలతో ఎంవోలు చేసుకోవడం విదిత‌మే. అందులో భాగంగా రాష్ట్రంలో ఏర్పాటు కానున్న డేటా, గ్లోబల్ సెంటర్స్ తో హైదరాబాద్ గ్లోబల్ హబ్ గా మారనుంది. అంతేకాక మూసీ పున‌నుజ్జీవం, ఫ్యూచ‌ర్ సిటీ అవ‌స‌రాలను దృష్టిలో పెట్టుకుని అందుకు అనుగుణంగా ప్రణాళికలు రూపొందించామ‌ని చెప్పారు.

3 ట్రిలియ‌న్ డాల‌ర్ల ఆర్థిక వ్య‌వ‌స్థే ల‌క్ష్యం

రాష్ట్ర‌ ప్ర‌భుత్వం 2047కు 3 ట్రిలియ‌న్ డాల‌ర్ల ఆర్థిక వ్య‌వ‌స్థ‌గా రాష్ట్రాన్ని నిర్మించాల‌ని ల‌క్ష్యంగా పెట్టుకుంది. అందుకు అవ‌స‌ర‌మైన ఖ‌చ్చిత‌మైన ప్ర‌ణాళిక‌తో ముందుకు పోతోంది.  3 ట్రిలియన్ డాలర్ల ఆర్థిక వ్యవస్థగా రాష్ట్రం అభివృద్ధి చెందాలంటే జీఎస్డీపీ 13 శాతం పెరగాలి. జీఎస్డీపీ పెరగాలంటే అదే స్థాయిలో విద్యుత్తు వినియోగం పెరుగుదల ప్రతి ఏటా10 శాతం ఉంటుంద‌ని అంచ‌నాలున్నాయి. ఆ లెక్క‌న 2047 నాటికి 1,39,310 మెగావాట్లకు పైగా విద్యుత్ అవసరం ఏర్పడుతుంది. ఈ స్థాయిలో విద్యుత్ పెరుగుదల అవసరం ఉండగా ప్రస్తుతం మన రాష్ట్రంలో మన రాష్ట్రంలో విద్యుత్ ఉత్పత్తి సామర్థ్యం 20,754 మెగావాట్లుగా ఉందని చెప్పారు. తెలంగాణ రాష్ట్రం 2014లో పవర్ డిమాండ్  6,755 మెగావాట్లు ఉండేది. 2025 నాటికి 17,162 కు పెరిగింది. 2025-26 నాటికి 18,825 మెగావాట్లకు పెరిగే అవకాశం ఉంది. అదే 2035 నాటికి 48,827 మెగావాట్లకు పెరుగుతుందనే అంచ‌నాలున్నాయి. 2025 నుంచి ప్రతి ఏటా 8.50 శాతం పెరుగుద‌ల‌తో.. 2047 నాటికి ప్రతి ఏటా 10 శాతం మేర గ్రోత్ రేట్ ఉండ‌వ‌చ్చ‌నే అంచ‌నాలున్నాయ‌ని చెప్పారు. భవిష్యత్తులో విద్యుత్ డిమాండ్ అవసరాలు ఈ విధంగా ఉండగా ప్రస్తుతం రాష్ట్రంలో విద్యుత్ ఉత్పత్తి సామర్థ్యం 20,754 మెగావాట్లుగా ఉంది. కాబట్టి 2047 లక్ష్యానికి చేరుకునేందుకు విద్యుత్తు ఉత్పత్తిని పెంచుకోవాలన్నారు. విద్యుత్ వినియోగంలో 2030 నాటికి  50 శాతం గ్రీన్ ఎనర్జీనే ఉండాలని పారిస్ ఒప్పందం చెబుతోంది. 2070 నాటికి పూర్తిగా గ్రీన్ ఎనర్జీనే వినియోగించాలనే అందులో స్ప‌ష్టంగా ఉంది. గ‌త ప‌దేళ్లు అధికారంలో ఉన్న ప్రభుత్వం విద్యుత్తు పాలసీ తీసుకురాకపోవడం వల్ల సోలార్, థర్మల్, విండ్, పంప్డ్ స్టోరేజీలలో మనం వెనుకబడి ఉన్నామ‌ని చెప్పారు. సీఈఏ ప్రకారం 2029-30 నాటికి రాష్ట్రం మైనస్ 243 మిలియన్ యూనిట్లకు వెళుతుంద‌ని చెప్పారు. 2029-30 నాటికి విద్యుత్ స్టోరేజీ 7366 మెగావాట్లు అవసరమని.. సోలార్ పవర్ కొనుగోలు చేయాలంటే 25 ఏళ్ల అగ్రిమెంట్ చేసుకోవాల్సి ఉంటుంది. ఇప్పటికైనా విద్యుత్ ఉత్పత్తిని పెంచుకోకపోతే భవిష్యత్తులో ఇబ్బందులు తప్పవని చెప్పారు. విద్యుత్ ను బ్యాటరీ స్టోరేజ్, పంప్డ్ స్టోరేజుల్లో అందుబాటులోకి తీసుకురావాలని రాష్ట్ర ప్రభుత్వం భావిస్తోందన్నారు. రాష్ట్రంలో 12 ప్రాంతాల్లో పంప్డ్ స్టోరేజ్ పాయింట్లకు అవకాశం ఉంది. పంప్డ్ స్టోరేజ్ కు తెలంగాణ అనుకూలమైన రాష్ట్రం.  రాష్ట్రానికి కావాల్సిన వాటర్, ఎనర్జీ పుష్కలంగా ఉన్నాయని, ప్రపంచంతో పోటీపడే విధంగా తీర్చిదిద్దాలనే లక్ష్యంతో సీఎం రేవంత్ రెడ్డి నాయకత్వంలో రాష్ట్రం ముందుకెళ్తున్నదన్నారు. యాదాద్రి పవర్ ప్రాజెక్ట్ స‌మీపంలో బొగ్గు గనులు లేవు. అందువ‌ల్ల వందల కిలోమీటర్ల నుంచి బొగ్గు తీసుకురావాల్సి వస్తోందని చెప్పారు. ఈ కార‌ణం వ‌ల్ల విద్యుత్ ఉత్పత్తిపై భారం పడుతోందన్నారు. ప్ర‌జా ప్రభుత్వం బొగ్గు గనుల వద్దనే థర్మల్ ప్రాజెక్ట్ను నిర్మించాలని చూస్తోంది. ఎన్టీపీసీ లేదా జెన్ కో ఎవరు తక్కువ ధరకు నిర్మిస్తే వారికే ఇస్తామని చెప్పారు.