దేశంలో 73 శాతం మంది వంట ఇంట్లోనే

తాజా పదార్థాలు, కుటుంబ విలువలే కారణం

బయటి ఆహారానికే అమెరికన్ల ఇంట్రెస్ట్

అక్కడే ఇంట్లో వంట చేసేది 57 శాతం మందే

న్యూఢిల్లీ: అమ్మ వండిపెట్టే ఆహారమే ఒంటికి మంచిది అని మన పెద్దలు చెప్తుంటారు. దాన్ని అక్షరాలా నిజం చేస్తున్నామట. ప్రపంచం మొత్తంలో ఇంటి ఆహారానికి అధిక ప్రాధాన్యం ఇచ్చేవారిలో అత్యధికులు ఎవరు? అంటే భారతీయులే.. అని తాజా అధ్యయనంలో తేలింది. ప్రపంచవ్యాప్తంగా ప్రజల ఆహారపు అలవాట్లు, రోజూ ఇంట్లో వంట చేసుకునే పద్ధతులు, సాంస్కృతిక, ఆర్థిక, సామాజిక పరిస్థితులపై ప్రముఖ డేటా సంస్థ స్టాటిస్టా 2024లో నిర్వహించిన కన్జుమర్ ఇన్‌సైట్స్ సర్వేలో ఆసక్తికర విషయాలు వెల్లడయ్యాయి. ఎనిమిది దేశాల్లో జరిపిన ఈ సర్వేలో, రోజూ ఇంట్లో వంట చేసుకునే వారిలో భారతీయులు అగ్రస్థానంలో నిలవగా, అమెరికన్లు చివరి స్థానంలో ఉన్నారు. ఈ సర్వే ప్రకారం, భారతదేశంలో కుటుంబానికి భోజనం సిద్ధం చేసే బాధ్యత ఉన్నవారిలో ఏకంగా 73 శాతం మంది ప్రతిరోజూ ఇంట్లోనే వంట చేస్తున్నట్లు తెలిపారు. భారతీయ వంట సంప్రదాయాలు, తాజా పదార్థాలతో వంట చేసుకోవాలనే తపన, కుటుంబ విలువలు ఇందుకు ప్రధాన కారణాలుగా నిలుస్తున్నాయి. ఇంటి భోజనం ఆరోగ్యకరమనే బలమైన నమ్మకం కూడా భారతీయులను ఈ విషయంలో ముందు నిలుపుతోంది. మరోవైపు, అమెరికా ఈ జాబితాలో అట్టడుగున నిలిచింది. ఇక్కడ కేవలం 57 శాతం మంది మాత్రమే రోజూ ఇంట్లో వంట చేస్తున్నారు. సర్వే చేసిన 8 దేశాల సగటు (63 శాతం) కంటే ఇది చాలా తక్కువ. అమెరికాలో బిజీ జీవనశైలి, ఫాస్ట్ ఫుడ్ చైన్‌ల విస్తృత లభ్యత, టేక్‌అవే, ఫ్రోజెన్ మీల్స్ వంటి సౌకర్యవంతమైన ప్రత్యామ్నాయాలు ప్రజలను ఇంటి వంటకు దూరం చేస్తున్నాయి. సమయం ఆదా చేసుకోవాలనే ఆలోచనతో ఎక్కువమంది బయటి ఆహారంపై ఆధారపడుతున్నారు. ఇక, ఫ్రాన్స్‌లో రోజూ ఇంట్లో వంట చేసేవారి సంఖ్య 62 శాతంగా ఉంది. ఇక్కడి ప్రజలు తాజా, స్థానిక ఉత్పత్తులతో వంట చేయడానికి ఇష్టపడతారు. అయితే, ప్రపంచీకరణ, పట్టణీకరణ, ఫుడ్ డెలివరీ యాప్‌ల పెరుగుదల వంటి కారణాలతో యూరప్, ఆసియా దేశాల్లోనూ క్రమంగా మార్పులు చోటుచేసుకుంటున్నాయి.