అతివేగపు గుర్రం పరుగులు..

రక్తంతో మూలిగే రహదారులు..

ఒక్క క్షణంలో ఆగిపోయే గుండెలు..

మద్యం మత్తులో చావుకు ఆహ్వానాలు..

హెల్మెట్‌ లేని తలలు తునాతునకలు..

అవిటితనం చూపించే కాళ్లూచేతులు..

అందుకే, ఒక్క నిమిషం మిత్రమా..!

ఇంట్లోవాళ్ల గతేం కానని ఆలోచించు!

నీవాళ్ల కోసమైనా నెమ్మదించు!!

దేశవ్యాప్తంగా, ముఖ్యంగా తెలుగు రాష్ట్రాలలో రోడ్డు ప్రమాదాల సంఖ్య ఆందోళనకర స్థాయిలో పెరుగుతోంది. కేంద్ర రోడ్డు రవాణా, రహదారుల మంత్రిత్వ శాఖ గణాంకాల ప్రకారం, భారతదేశంలో ప్రతి సంవత్సరం దాదాపు ఐదు లక్షల రోడ్డు ప్రమాదాలు జరుగుతున్నాయి. వీటిలో లక్షన్నరకు పైగా ప్రజలు ప్రాణాలు కోల్పోతున్నారు. ఈ మరణాలకు ప్రధాన కారణాలు.. అతివేగం, నిర్లక్ష్యపు డ్రైవింగ్‌, మద్యం సేవించి వాహనం నడపడం, ట్రాఫిక్‌ నిబంధనలను ఉల్లంఘించడం. ఈ మారణహోమాన్ని అరికట్టాలంటే ప్రభుత్వాలు కఠిన చర్యలు తీసుకోవాలి, అదే సమయంలో ప్రజలు కూడా బాధ్యతాయుతంగా వ్యవహరించాలి. దేశవ్యాప్తంగా నమోదైన రోడ్డు ప్రమాద మరణాలలో 70% కంటే ఎక్కువ అతివేగం కారణంగానే సంభవిస్తున్నాయి. డ్రైవర్ల నిర్లక్ష్యం, మొబైల్‌ ఫోన్‌ డ్రైవింగ్‌, నిద్రలేమి వంటి కారణాలతో అధికశాతం ప్రమాదాలు జరుగుతున్నాయి. అన్ని చోట్లా రోడ్లు సరిగ్గా లేకపోవడం, తగినన్ని లేదా అసలే సిగ్నళ్లు లేకపోవడం కూడా ప్రమాదాలకు దారితీస్తున్నాయి. ప్రమాద బాధితుల్లో సగానికి పైగా (దాదాపు 44.5%) ద్విచక్ర వాహన వినియోగదారులు ఉండటం గమనార్హం. ప్రభుత్వాలు కేవలం అవగాహన కార్యక్రమాలతో సరిపెట్టకుండా, ట్రాఫిక్‌ నిబంధనలను కఠినంగా అమలు చేయాలి. ముఖ్యంగా అతివేగం, మద్యం సేవించి వాహనం నడపడంపై జీరో విజన్‌ పాలసీని అమలు చేయాలి. ప్రమాదాలు ఎక్కువగా జరిగే ‘బ్లాక్‌ స్పాట్స్‌’ను గుర్తించి, అక్కడ రోడ్ల డిజైన్‌లో లోపాలను సరిదిద్దాలి, తగిన సూచిక బోర్డులు, వేగ నియంతణ బోర్డులు ఏర్పాటు చేయాలి. ప్రమాద బాధితులకు సకాలంలో చికిత్స అందించేందుకు సాంకేతికతను పెంపొందించాలి. ‘నగదు రహిత చికిత్స పథకం-2025’ వంటి పథకాలను సమర్థవంతంగా అమలు చేయాలి. పాఠశాల స్థాయి నుండే రోడ్డు భద్రతపై విద్యార్థులకు అవగాహన కల్పించాలి. ప్రభుత్వం ఎన్ని చర్యలు తీసుకున్నా, ప్రజల భాగస్వామ్యం లేనిదే పూర్తిస్థాయిలో ప్రమాదాలను అరికట్టడం సాధ్యం కాదు. ప్రతి పౌరుడు హెల్మెట్‌, సీట్‌ బెల్టు తప్పనిసరిగా ధరించాలి. డ్రైవింగ్‌ చేసేటప్పుడు మొబైల్‌ ఫోన్‌ వాడకాన్ని పూర్తిగా మానేయాలి. ప్రతి ప్రమాదం వెనుక ఒక కుటుంబం చితికిపోతోందనే విషయాన్ని గుర్తించి, బాధ్యతాయుతంగా వ్యవహరించాలి. రోడ్డు భద్రత అనేది సామాజిక బాధ్యత. ప్రభుత్వ యంత్రాంగం, ప్రజలు కలిసికట్టుగా కృషి చేస్తేనే ప్రాణనష్టాన్ని తగ్గించగలం. లేకపోతే, నిత్యం గాల్లో కలుస్తున్న ప్రాణాలకు అంతు ఉండదు.

(బాక్స్‌)

అలసత్వం ప్రభుత్వాలదే..!

ట్రాఫిక్‌ నిబంధనలు ఉల్లంఘించిన వారికి జరిమానాలు విధించడం.. ఆ తర్వాత వాటిపై ప్రభుత్వం రాయితీలు ప్రకటించడం చూస్తున్నదే. వాహనాల రకాన్ని బట్టి 75 నుంచి 25 శాతం వరకు డిస్కౌంట్లు ఇస్తుంటారు. పేరుకుపోయిన పెండిరగ్‌ చలాన్ల బకాయిలను రికవరీ చేసుకునేందుకు ప్రభుత్వం అప్పుడప్పుడు డిస్కాంట్లు ఇస్తుంటుంది. ఇలా డిస్కౌంట్లు ప్రకటించడంపై హైకోర్టు తీవ్ర అభ్యంతరం వ్యక్తం చేసింది. ఈ రాయితీలు ఇవ్వడం వలన చట్టపరమైన పరిణామాల పట్ల ప్రజల్లో ఉన్న భయం, గౌరవం బలహీనపడతాయని హైకోర్టు వ్యాఖ్యానించింది. ముఖ్యంగా.. రాయితీలు ట్రాఫిక్‌ క్రమశిక్షణారాహిత్యాన్ని మరింత పెంచుతాయని, ప్రజలు నిబంధనలను ఉల్లంఘించినా ఏదో ఒక దశలో రాయితీ లభిస్తుందనే భావన పెరిగే అవకాశం ఉందని కోర్టు పేర్కొంది.జస్టిస్‌ ఎన్‌.వి. శ్రవణ్‌కుమార్‌ విచారణ చేపట్టిన ఈ కేసులో.. ఈ-చలానా వ్యవస్థలో అత్యవసరంగా మార్పులు చేయాల్సిన అవసరం ఉందని హైకోర్టు ప్రభుత్వానికి స్పష్టం చేసింది. ట్రాఫిక్‌ ఉల్లంఘన జరిగినప్పుడు అది ఏ చట్టంలోని ఏ సెక్షన్‌ కింద ఉల్లంఘనగా పరిగణించబడిరదనే వివరాలను చలానా జారీ సమయంలో స్పష్టంగా పొందుపరచగలిగే వ్యవస్థను అభివృద్ధి చేయాలని కోర్టు ఆదేశించింది. ఈ మేరకు తీసుకున్న చర్యలు, వ్యవస్థ అభివృద్ధి ఏ దశలో ఉందో సమగ్ర నివేదికను డిసెంబర్‌ 9వ తేదీలోగా సమర్పించాలని హైకోర్టు హోంశాఖను ఆదేశించింది. ఈ సాంకేతిక మెరుగుదల కేంద్ర మోటారు వాహన నిబంధన 167 ప్రకారం తప్పనిసరి అని న్యాయమూర్తి గుర్తు చేశారు. హైదరాబాద్‌ తార్నాకకు చెందిన వి.రాఘవేంద్రాచారి అనే వ్యక్తి బైక్‌పై ట్రిపుల్‌ రైడిరగ్‌ చేసినందుకు విధించిన రూ.1200 జరిమానాను సవాలు చేస్తూ దాఖలు చేసిన పిటిషన్‌ విచారించిన న్యాయస్థానం ఈ మేరకు ఆదేశాలు ఇచ్చింది. పిటిషనర్‌ తరఫు న్యాయవాది వాదనలు వినిపిస్తూ.. 1988 మోటారు వాహనాల చట్టంలోని సెక్షన్‌ 128 రెడ్‌విత్‌ 177 ప్రకారం ట్రిపుల్‌ రైడిరగ్‌కు కేవలం రూ.100 నుంచి రూ.300 మాత్రమే జరిమానా విధించాల్సి ఉంటుందని కోర్టు దృష్టికి తీసుకువచ్చారు. 2019లో కేంద్రం చేసిన చట్ట సవరణలను తెలంగాణ ప్రభుత్వం ఇంకా అమలులోకి తీసుకురాకపోవడంతో పాత నిబంధనల ప్రకారమే చలానాలు విధించాలని వాదించారు. అంతేకాక, చట్టంలోని ఏ నిబంధన కింద ఉల్లంఘన జరిగింది అనే వివరణ చలానాలో లేకపోవడం కూడా చట్ట విరుద్ధమని తెలిపారు. అందుకు ప్రతిస్పందనగా.. హోంశాఖ తరఫు న్యాయవాది మహేశ్‌ రాజె ప్రస్తుత చలానా వ్యవస్థలో చట్ట నిబంధనలతో సహా పూర్తి వివరాలు పొందుపరచడానికి సాంకేతికంగా వీలుకావడం లేదని కోర్టుకు వివరించారు. అయినప్పటికీ, అధికారులు నిబంధనలతో చలానా జారీ చేసే విధంగా వ్యవస్థను మెరుగుపరచడానికి ప్రయత్నాలు చేస్తున్నారని తెలిపారు. ఇరుపక్షాల వాదనలు విన్న న్యాయమూర్తి.. సెక్షన్‌ 184 కింద జరిమానా రూ.1000 ఉన్నప్పుడు, పిటిషనర్‌కు రూ.1200 ఎలా విధించారనే అంశంపై కూడా లోతుగా పరిశీలించాల్సిన అవసరం ఉందని పేర్కొంటూ, తదుపరి విచారణను వాయిదా వేశారు