యూట్యూబ్‌లో సరికొత్త సంచలనం

తొలి భారత వీడియోగా రికార్డు

న్యూఢిల్లీ: భారత దేశ చరిత్రలోనే 500 కోట్ల వ్యూస్ సాధించిన వీడియోగా హనుమాన్ చాలీసా రికార్డు సృష్టించింది. ప్రపంచంలోనే టాప్ 10లో నిలిచిన ఈ వీడియోను టీ సిరీస్ నిర్మించింది. ఈ వీడియోలో దివంగత గుల్షన్ కుమార్ స్వయంగా నటించారు. మే 10 , 2011 న ఈ వీడియో యూట్యూబ్‌లో అప్లోడ్ చేశారు. క్షణ క్షణం హిట్స్ పెరుగుతూనే ఉన్న ఈ వీడియోకి లలిత్ సేన్, చందర్ సంగీతాన్ని అందించారు. హరిహరన్ ఈ తులసీదాస విరచిత చాలీసాను అద్భుతంగా ఆలపించారు. ఈ ఘనతపై టీ-సిరీస్ స్పందిస్తూ.. ‘మీ అచంచలమైన ప్రేమ, భక్తి, బలం, సమర్పణతో, హనుమాన్ చాలీసా 5 బిలియన్ల వీక్షణలను దాటిన భారతదేశంలోని ఏకైక వీడియోగా మారింది. ధ్వనించే ప్రపంచంలో విశ్వాసం ఎల్లప్పుడూ తన మార్గాన్ని కనుగొంటుందని శాశ్వతంగా గుర్తు చేస్తుంది’ అంటూ పోస్ట్ చేసింది. టీ- సిరీస్ అధినేత భూషణ్ కుమార్ కూడా ఈ రికార్డుపై స్పందిస్తూ తన తండ్రి గుల్షన్ కుమార్ జీ ప్రతి ఇంటికి ఆధ్యాత్మిక సంగీతాన్ని తీసుకెళ్లడానికి తన జీవితాన్ని అంకితం చేశారని,  ఆయన దార్శనికతకు వ్యూస్ ఒక ప్రతిబింబమంటూ సంతోషాన్ని వ్యక్తం చేశారు.

టాప్ 5 ఇండియన్ సాంగ్స్

1. హనుమాన్ చాలీసా

2. 'లెహెంగా' అనే పంజాబీ ప్రైవేట్ సాంగ్

3. హర్యాన్వి పాట '52 గజ్ కా డామన్'

4. రౌడీ బేబీ (ధనుష్, సాయి పల్లవి డాన్స్)

5. జరూరి థా