పైరసీ సైట్ల నుంచి కొని ‘బప్పం’లో అప్‌లోడ్

పోలీసుల విచారణలో కీలక విషయాలు

హైదరాబాద్, నవంబర్ 26 (ఈవార్తలు): ఐబొమ్మ రవి కేసులో మరో విషయం వెలుగులోకి వచ్చింది. సినిమాలను అతడు పైరసీ చేయలేదని తెలుస్తోంది. వేరే విధంగా సినిమాలను కొనేవాడని విచారణలో వెల్లడైంది. సినిమాలను కొని వాటిని కంటెంట్ మేనెజ్‌మెంట్ సిస్టమ్ ద్వారా ఐబొమ్మలో అప్‌లోడ్ చేసేవాడని పోలీసులు గుర్తించారు. కొన్ని రోజులుగా ఐబొమ్మ రవిని విచారించిన పోలీసులు కీలక విషయాలను తెలుసుకున్నారు. అతడు సినిమాలను నేరుగా పైరసీ చేయలేదని, టెలిగ్రామ్, మూవీరూల్జ్, తమిళ్ ఎంవీ వంటి పైరసీ సైట్ల నుంచి కొనుగోలు చేసేవాడని తెలిసింది. సినిమా క్లారిటీ సరిగా లేకపోతే.. దానికి హెచ్‌డీ‌గా మార్చుకునేందుకు కొన్ని టూల్స్ ఉపయోగించేవాడు. తర్వాత ఐబొమ్మ, బప్పం సైట్లలో అప్‌లోడ్ చేసేవాడు. ఇందుకుగానూ సినిమా కొన్నందుకు క్రిప్టో కరెన్సీ రూపంలో డబ్బులు చెల్లించేవాడు. ఈ సైట్ల ద్వారా లక్షల మంది డేటాను తన వద్ద స్టోర్ చేసుకున్నాడు. అయితే, బెట్టింగ్, గేమింగ్ యాప్స్ ప్రమోట్ చేసి కోట్లు సంపాదించాడని పోలీసులు పేర్కొంటున్నారు. ఐబొమ్మ ద్వారా రూ.కోట్లు సంపాదించిన రవి ఎక్కువగా విదేశాలకు తిరుగుతూ ఖర్చుచేశాడు.

14 రోజుల జ్యుడీషియల్ రిమాండ్

రవికి నాంపల్లి కోర్టు 14 రోజుల జ్యుడీషియల్ రిమాండ్ విధించింది. వీటితో పాటు రవిపై పోలీసులు మరో మూడుకేసుల్లో పీటీ వారెంట్ జ్యారీ చేశారు. ఈ వారెంట్లపై విచారించిన కోర్టు రవిని మరోసారి విచారించడానికి 3 రోజుల కస్టడీకి పోలీసులకు అనుమతిచ్చింది. ఈ నేపథ్యంలో గురువారం చంచల్‌గూడ జైలులో రవిని పోలీసులు అదుపులోకి తీసుకోనున్నారు. అంతకుముందు సోమవారం పోలీసు కస్టడీ ముగియగా.. కస్టడీలో అతని నుంచి పోలీసులు కీలక సమాచారం సేకరించినట్లు తెలుస్తోంది. రవి ఒక్కడే సినిమాలు ఐబొమ్మ, బప్పం సైట్లలో అప్‌లోడ్ చేశాడని అలా రూ. 100 కోట్లకు పైగా సంపాదించాడని పోలీసులు నిర్ధారించుకున్నారు. ఇందులో రూ.30 కోట్లకు సంబంధించిన బ్యాంకు లావాదేవీలను ఇప్పటికే సేకరించారు. టెలిగ్రామ్‌ యాప్‌ ద్వారా బేరమాడి మరీ సినిమాలు కొనుగోలు చేశాడు. మూవీపై క్లిక్‌ చేయగానే.. 15 యాడ్స్‌కు డైరెక్ట్‌ లింక్‌ అయ్యేలా ఏర్పాటు చేశాడని విచారణలో పోలీసులు గుర్తించారు