టీమిండియా మాజీ కెప్టెన్, దిగ్గజ క్రికెటర్ సునీల్ గవాస్కర్.. క్రికెట్ పిచ్‌ల రేటింగ్ విధానంపై తీవ్ర స్థాయిలో ధ్వజమెత్తారు. ఆస్ట్రేలియా, ఇంగ్లండ్ మధ్య పెర్త్‌లో జరిగిన యాషెస్ టెస్ట్ రెండు రోజుల్లోనే ముగియడం, ఆ పిచ్‌కు ఐసీసీ 'వెరీ గుడ్' రేటింగ్ ఇవ్వడంపై ఆయన ఘాటుగా స్పందించారు. పేస్, బౌన్స్‌కు అనుకూలించే పిచ్‌లను గొప్పవిగా, స్పిన్‌కు అనుకూలించే ఉపఖండంలోని పిచ్‌లను నాసిరకమైనవిగా చూసే ద్వంద్వ వైఖరిని ఆయన తప్పుబట్టారు. 2025-26 యాషెస్ సిరీస్‌లో భాగంగా పెర్త్‌లో జరిగిన తొలి టెస్టు కేవలం రెండు రోజుల్లోనే ముగిసింది. ఈ మ్యాచ్‌లో బౌలర్లు పూర్తిగా ఆధిపత్యం చెలాయించారు. అయినప్పటికీ, అంతర్జాతీయ క్రికెట్ మండలి (ఐసీసీ) ఈ పిచ్‌కు అత్యుత్తమ రేటింగ్ అయిన 'వెరీ గుడ్' అని కితాబునిచ్చింది. అయితే, ఈ మ్యాచ్‌లో ఆడిన ఆస్ట్రేలియా ఓపెనర్ ఉస్మాన్ ఖవాజా మాత్రం ఆ పిచ్ 'చెత్తగా' ఉందంటూ తీవ్ర విమర్శలు చేశాడు. తొలిరోజే 19 వికెట్లు పడటం, చాలా మంది ఆటగాళ్లు గాయపడటమే దీనికి నిదర్శనమని అన్నారు. ఈ నేపథ్యంలో గవాస్కర్.. ‘పేస్, బౌన్స్‌తో ప్రాణాలకు ప్రమాదకరంగా ఉండే పిచ్‌లను ఎప్పుడూ చెడ్డవిగా చూడరు. అదే ఉపఖండంలో బంతి తిరిగితే మాత్రం దాన్ని అవమానంగా పరిగణిస్తారు. ఇది పాత క్రికెట్ శక్తుల కథనం’ అని మండిపడ్డారు.