ముంబై: డిసెంబర్ మెుదటి రోజున రూపాయి మారకపు విలువ డాలర్‌తో పోల్చితే అత్యంత కనిష్ట స్థాయికి పడిపోయింది. ఇంట్రాడేలో అమెరికన్ డాలర్‌తో రూపాయి మారకం విలువ రూ.89.83కి చేరింది. ఇది శుక్రవారం ముగింపు ధర రూ.89.35తో పోలిస్తే ఒక్క రోజులోనే ఇది 48 పైసలు పతనాన్ని చూడటం గమనార్హం. దీంతో రూపాయి మారకపు విలువ చరిత్రలో ఎన్నడూ చూడని కనిష్టాలకు పడిపోతోంది. దాదాపుగా ఒక డాలర్ విలువ రూ.90కి చేరువలోకి వచ్చేసింది. ఊహించిన దానికంటే మెరుగైన అమెరికా జాబ్స్ రిపోర్ట్ కారణంగా.. యూఎస్ ఫెడరల్ రిజర్వ్ వడ్డీ రేట్లను తగ్గిస్తుందనే అంచనాలు సన్నగిల్లాయి. దీని ప్రభావం అభివృద్ధి చెందుతున్న మార్కెట్ల కరెన్సీలపై ముఖ్యంగా రూపాయిపై పడిందని నిపుణులు చెబుతున్నారు. దేశంలోని దిగుమతిదారులు తమ చెల్లింపు అవసరాల కోసం డాలర్లను ఎక్కువగా కొనుగోలు చేస్తుండటం.. మరోపక్క ఎగుమతిదారులు సరఫరాలు తగ్గటం రూపాయిని మరింత బలహీనం మార్చేసింది. ఆగస్టు చివర్లో అమెరికా, భారతీయ ఎగుమతులపై భారీ సుంకాలు విధించినప్పటి నుంచి విదేశీ పెట్టుబడిదారులు భారతీయ ఈక్విటీల నుంచి దాదాపు16.5 బిలియన్ డాలర్లను ఉపసంహరించుకున్నారు. దీంతో 2025లో ఆసియా కరెన్సీలలో అత్యంత బలహీనమైనదిగా రూపాయి నిలిచింది. డాలర్‌తో పోలిస్తే ఇప్పటివరకు 4.3% విలువ పతనమైంది.