వన్‌టైం చార్జీలు రూ.34 వేలు ఎక్స్‌ట్రా

ఇంకా ప్రకటించని కమర్షియల్ ప్యాకేజీ

జనవరి లేదా ఫిబ్రవరిలో మార్కెట్‌లోకి

న్యూఢిల్లీ: భారతదేశంలో ప్రారంభించటానికి స్టార్‌లింక్ అన్ని ప్రభుత్వ అనుమతులను పొందింది. ప్రస్తుతం, ఆ కంపెనీ శాట్‌కామ్ ఆమోదం, స్పెక్ట్రమ్ కేటాయింపు కోసం వేచి ఉంది. నివేదికల ప్రకారం.. ఈ రెండు ప్రక్రియలు 2025 చివరి నాటికి పూర్తవుతాయని భావిస్తున్నారు. స్టార్‌లింక్ ఉపగ్రహ ఇంటర్నెట్ సేవను దేశంలో జనవరి లేదా ఫిబ్రవరి 2026లో ప్రారంభించే అవకాశాలున్నాయి. తాజాగా, స్టార్ లింక్ తన వెబ్‌సైట్‌లో ఇండియాలో తమ ధరలను పొందుపర్చింది. దీని ప్రకారం రెసిడెన్షియల్ ప్లాన్ నెలకు రూ.8,600గా నిర్ణయించారు. ఇక యాంటీనా, రౌటర్ కిట్‌, వన్ టైమ్ హార్డ్‌వేర్ ఖర్చు రూ.34 వేలుగా ఉంది. స్పేస్ ఎక్స్ ఉపగ్రహ నెట్‌వర్క్‌కి అనుసంధానం కావడానికి హార్డ్ వేర్ అవసరమని స్టార్ లింక్ చెబుతోంది. అలాగే ఆన్‌లిమిటెడ్ ఇంటర్నెట్‌తో 30 రోజులు ట్రయల్ పీరియడ్ ఇవ్వనున్నారు. ఒకవేళ కనెక్టివిటీ పట్ల మీరు సంతోషంగా లేకపోతే బయటకి రావచ్చు. అయితే, వ్యాపారుల కోసం అందించే ఇంటర్నెట్ సర్వీస్ ధరలను స్టార్ లింక్ ఇంకా వెల్లడించలేదు. నియంత్రణ అనుమతులు, రోల్ అవుట్ ప్లాన్లపై చర్చించిన తర్వాత ధరలను నిర్ణయించనున్నారు. ఇతర దేశాల్లో బిజినెస్ ప్యాకేజీలు అధిక వేగాన్ని కలిగి ఉన్నాయి. మారుమూల ప్రాంతాల్లోని కంపెనీలు, పరిశ్రమలకు ఈ ఇంటర్నెట్ ఉపయోగపడే అవకాశముంది. అసలు ఇంటర్నెట్ సౌకర్యం లేని మారుమూల గ్రామాలను స్టార్ లింక్ టార్గెట్ చేసింది. గ్రామాల్లోని గృహాలు, చిన్న వ్యాపారుల లక్ష్యంగా ముందుకెళ్లనుంది. బ్రాడ్‌బ్యాండ్, ఫైబర్ నెట్‌వర్క్ కనెక్షన్లలో ఇబ్బంది పడుతున్న ప్రాంతాలపై దృష్టి పెట్టనుంది. కొండ ప్రాంతాలు, గ్రామీణ ప్రాంతాలు, హైవే పట్టణాలలోని కుటుంబాలకు చేరువ చేసేలా ప్రణాలికలు సిద్దం చేసింది స్టార్ లింక్. అయితే స్టార్ లింక్ ఇంటర్నెట్ ధరలు అధికంగా ఉండటంతో ఇండియాలో స్పందన ఎలా ఉంటుందనేది చర్చనీయాంశంగా మారింది.