సాయి దుర్గా తేజ్ తన తదుపరి సినిమాను సిద్ధార్థ్ రాజ్ కుమార్ అనే కొత్త దర్శకుడితో చేయబోతున్నాడు. ఈ సిద్ధార్థ్ ఎవరో కాదు, మన రెబల్ స్టార్ ప్రభాస్ కజిన్. గతంలో నటుడిగా పరిచయమైన సిద్ధార్థ్, ఇప్పుడు మెగాఫోన్ పట్టి డైరెక్టర్ గా మారబోతున్నాడు. ప్రభాస్ ఫ్యామిలీ నుంచి డైరెక్షన్ వైపు వస్తున్న మొదటి వ్యక్తి కావడంతో అందరిలోనూ ఆసక్తి నెలకొంది. ఈ సినిమా జానర్ కూడా చాలా ఫ్రెష్ గా ఉండబోతోంది. ఇదొక ఫీల్ గుడ్ రొమాంటిక్ డ్రామా అని తెలుస్తోంది. సుప్రీం హీరోని మనం ఈ మధ్య ఎక్కువగా సీరియస్ రోల్స్ లో చూస్తున్నాం. చాలా గ్యాప్ తర్వాత మళ్ళీ లవర్ బాయ్ గా మారి, వింటేజ్ తేజ్ ని గుర్తుచేయడానికి సిద్ధమవుతున్నాడు. ఈ కథలో లవ్, ఎమోషన్స్ చాలా బలంగా ఉంటాయట. అయితే ఈ క్రేజీ ప్రాజెక్ట్ ఇప్పుడప్పుడే సెట్స్ పైకి వెళ్ళదు. దీనికి ఇంకా చాలా సమయం ఉంది. లేటెస్ట్ అప్డేట్ ప్రకారం 2026 మార్చిలో ఈ సినిమా షూటింగ్ మొదలుకానుంది. ఈలోపు తేజ్ చేతిలో ఉన్న కమిట్మెంట్స్ అన్నీ పూర్తి చేసుకుంటారు. సిద్ధార్థ్ కూడా స్క్రిప్ట్ ను మరింత పకడ్బందీగా సిద్ధం చేసుకునే పనిలో ఉన్నాడు.